«ارسەلورميتتال تەمىرتاۋ» كومپانياسىنىڭ قۇنىن 3,5 ميلليارد دوللاردان تومەندەتتىك - قانات شارلاپايەۆ
ArcelorMittal كومپانياسى قازاقستان رەسپۋبليكاسىنا قاتىستى تالاپتاردان، سوت تالابىنان تولىق باس تارتاتىنى تۋرالى كەلىسىمگە قول قويدى. بۇل تۋرالى ق ر ونەركاسىپ جانە قۇرىلىس ءمينيسترى قانات شارلاپايەۆ ايتتى، دەپ حابارلايدى Kazinform.
«كەلىسسوزدەر اياسىندا ArcelorMittal قازاقستان رەسپۋبليكاسىنا ەشقانداي تالاپ قويمايتىنىن ەرەكشە ايتقىم كەلەدى. ArcelorMittal قازاقستان رەسپۋبليكاسىنا قاتىستى تالاپتاردان، سوت تالابىنان، باسقا دا قاراۋشىلىقتاردان تولىق باس تارتاتىنى تۋرالى كەلىسىمگە قول قويدى. كەلىسىم حالىقارالىق قۇقىق نورمالارىن تولىق ساقتاي وتىرىپ، قۇقىقتىق نەگىزدە جاسالدى»، - دەدى قانات شارلاپايەۆ ۇكىمەت ۇيىندە وتكەن بريفينگتە.
قانات شارلاپايەۆ ۇكىمەتتە وتكەن بريفينگتە «ارسەلورميتتال تەمىرتاۋ» كومپانياسىن قازاقستان قۇزىرەتىنە الۋ كەلىسسوزدەرى قالاي وتكەنىن ايتىپ بەردى.
مينيستر بيىلعى تامىز ايىندا ەل پرەزيدەنتى قاسىم- جومارت توقايەۆ «ارسەلورميتتال تەمىرتاۋ» ا ق- دا بولعان اپات كەزىندە كومپانيانىڭ ينۆەستيتسيالىق جانە وزگە دە مىندەتتەمەلەرىن ورەسكەل بۇزعانى تۋرالى ايتقانىن ەسكە سالدى. سول كەزدە مەملەكەت باسشىسى ا م ت- مەن ينۆەستيتسيالىق ىنتىماقتاستىقتى توقتاتۋ جونىندە تاپسىرما بەرگەن ەدى.
بۇل ۋاقىتتا قازاقستان ۇكىمەتى «ارسەلورميتتال تەمىرتاۋ» يەلەرىمەن ArcelorMittal كومپانياسىن مەتاللۋرگيالىق كومبينات قۇرامىنان شىعارۋ مۇمكىندىگى تۋرالى كەلىسسوزدەر جۇرگىزىپ جاتقان. كەلىسسوزدەر 2022-جىلدىڭ 3-قاراشاسىندا ا م ت ەنشىلەس كاسىپورنى - لەنين اتىنداعى شاحتادا بولعان قايعىلى اپاتتان كەيىن باستالعان ەدى.
قازاقستان ۇكىمەتى «ارسەلورميتتال تەمىرتاۋ» كومپانياسىنا ناقتى تالاپتار قويدى. كەلىسسوزدەر ناتيجەسىندە 2022 -جىلعى 9-جەلتوقساندا قازاقستان ۇكىمەتى مەن ArcelorMittal اراسىندا قازاقستاندىق تاراپقا كاسىپورىندى باعالاۋ جانە اۋديت جۇرگىزۋگە مۇمكىندىك بەرەتىن «Standstill Agreement» كەلىسىمىنە قول قويىلدى.
«كەلىسسوزدەر بارىسىندا ArcelorMittal 3,5 ميلليارد دوللار سۇرادى، بۇل حالىقارالىق كونسۋلتانتتاردىڭ ەسەبىنە سايكەس كەلمەدى. بۇل كەلىسسوزدەر پروتسەسىنىڭ ۇزاققا سوزىلۋىنىڭ باستى سەبەپتەرىنىڭ ءبىرى بولدى. كاسىپورىننىڭ توقتاپ قالماۋى ءۇشىن كەلىسسوزدەردى جەدەل ءارى جىلدام جۇرگىزۋ قاجەتتىلىگى تۋىندادى»، - دەدى قانات شارلاپايەۆ.
ونىڭ ايتۋىنشا، كەلىسسوزدەر پروتسەسى 11 راۋندتان تۇردى، ناتيجەسىندە ەكى تاراپ تا ورتاق ۇستانىمعا قول جەتكىزدى.
«قازاقستان ۇكىمەتى مەن «ارسەلورميتتال» اراسىنداعى كەلىسىمدى مەگا- مامىلە دەپ اتاۋعا بولادى، ونىڭ ەلىمىز ءۇشىن ماڭىزى ەرەكشە. «ارسەلورميتتال تەمىرتاۋ» جانە اقتاۋ قۇبىر زاۋىتىنىڭ قۇنىن 3,5 ميلليارد دوللاردان 286 ميلليون دوللارعا دەيىن تومەندەتتىك. بۇل ەلىمىزدىڭ ءىرى جانە تابىستى كەلىسسوزى بولدى. مامىلەنى جۇزەگە اسىرۋعا مەملەكەتتىك بيۋدجەتتەن ءبىر دە ءبىر تەڭگە جۇمسالعان جوق. جاڭا ينۆەستور ArcelorMittal باس كومپانياسىنىڭ قىسقا مەرزىمدى جانە ۇزاق مەرزىمدى مىندەتتەمەلەرى بويىنشا جاۋاپكەرشىلىكتى موينىنا الدى. $286 ميلليون دوللار تولىق جۇمىس ىستەپ تۇرعان ەكى كاسىپورىننىڭ قۇنى»، - دەپ ءتۇسىندىردى مينيستر.
ايتا كەتەيىك، بۇگىن «ارسەلورميتتال قازاقستاننىڭ» جاڭا ينۆەستورى انىقتالدى. جاڭا ينۆەستور - قازاقستاندىق بيزنەسمەن اندرەي لاۆرەنتيەۆ. ول 1979 -جىلى الماتى قالاسىندا دۇنيەگە كەلگەن. «Allur Group» كومپانيالار توبىنىڭ ديرەكتورلار كەڭەسىنىڭ ءتوراعاسى، ونىڭ قۇرامىندا «اگرو ماش حولدينگ» جانە «سارى ارقا اۆتوپروم» ج ش س بار. كومپانيالار توبى Chevrolet ،KIA ،JAC جانە LADA اۆتوبرەندتەرىنىڭ قازاقستان اۋماعىنداعى رەسمي ءوندىرۋشىسى جانە ديستريبيۋتورى.
سونداي- اق، «ارسەلورميتتال تەمىرتاۋدىڭ» اتاۋى «قارمەت» دەپ وزگەرۋى مۇمكىن.
اۆتور
ايجان سەرىكجان قىزى
