ارقارلى اسۋىندا تۇرىك قاعاناتى جاۋىنگەرلەرىنىڭ تاسقا سالىنعان سۋرەتى تابىلدى

الماتى. KAZINFORM - الكەي مارعۇلان اتىنداعى ارحەولوگيا ينستيتۋتى ماماندارى جۇرگىزگەن زەرتتەۋلەرى ناتيجەسىندە ارقارلى تاۋلارىندا تاسقا سالىنعان سۋرەتتەر تابىلدى. تۇرىك قاعاناتى داۋىرىندەگى ەپيكالىق شايقاس پەتروگليفتەرى - سولاردىڭ ءبىر توبى.

Теңдесі жоқ ескерткіш: Арқарлы асуында түрік қағанаты жауынгерлерінің тасқа салынған суреті табылды
Фото: Анель Айбасова

ارحەولوگ، ەكسپەديسيا جەتەكشىسى الەكساندر گورياچيەۆتىڭ ايتۋىنشا، ارقارلى تاۋىندا پەتروگليفتەردىڭ اۋقىمدى بىرنەشە كەشەنى بار.

- تاسقا قاشالىپ سالىنعان سۋرەتتەن قولدارىنا جەلبىرەتە تۋ ۇستاعان ءبىر توپ سالت اتتى ساربازدىڭ شايقاسىن كورۋگە بولادى. ولار - VII عاسىرداعى تۇرىك جاۋىنگەرلەرىنىڭ بەينەسى. سونداي- اق، تۇرىك قاعاناتىنىڭ العاشقى بيلەۋشىلەرى - اشينا رۋىنىڭ تاڭباسى تابىلدى. بۇل تۇرىكتەردىڭ جۋجاندارعا قارسى شىققان شايقاسى بولۋى مۇمكىن، - دەيدى الەكساندر گورياچيەۆ.

Теңдесі жоқ ескерткіш: Арқарлы асуында түрік қағанаты жауынгерлерінің тасқа салынған суреті табылды
Фото: Анель Айбасова

ايتۋىنشا، بۇل الەمدە تەڭدەسى جوق بىرەگەي تاريحي ەسكەرتكىش.

- كەسكىن قيىرشىق تاس زاۋىتىنىڭ جۇمىسى سالدارىنان قاتتى بۇلىنگەن، بولاشاقتا بىرنەشە شارشى مەتردى الىپ جاتقان جاۋىنگەرلىك پانو تولىعىمەن قالپىنا كەلتىرىلەدى دەپ ۇمىتتەنەمىز. شايقاس ساحناسى - ارقارلى تاۋىنداعى 38 جوتادان تابىلعان 4 مىڭنان استام پەتروگليفتىڭ ءبىر عانا ەسكەرتكىشى. سۋرەتتەر كەڭ كەزەڭدى قامتيدى - ەرتە قولا داۋىرىنەن (شامامەن 4 مىڭ جىل بۇرىن) XIX عاسىرعا دەيىن. مۇندا 40-تان استام كونە جانە ورتاعاسىرلىق قونىس پەن مىڭنان استام بەيىت تابىلدى. وندا نەگىزىنەن جاۋىنگەرلەر جەرلەنگەن، - دەدى ارحەولوگ.

В горах Архарлы обнаружили петроглифы с изображением воинов Тюркского каганата
Фото: Алма Муканова / Kazinform

الەكساندر گورياچيەۆتىڭ سوزىنشە، اسكەري قورىمداردىڭ سانى كونە زاماندا جانە ەرتە تۇركىلەر داۋىرىندە ارقارلى ماڭىزدى اسكەري نۇكتە، كەيىنىرەك كيەلى ورىن بولعانىن كورسەتەدى.

بۇدان بولەك، ول ارقارلى پەتروگليفتەرىندە جالايىر، البان رۋى مەن تولەنگىتتەردىڭ تاڭبالارى بەينەلەنگەنىن جەتكىزدى.

وسىعان دەيىن «ارقارلى تاۋىنىڭ پەتروگليفتەرى» اتتى مونوگرافيانىڭ جارىققا شىققانى تۋرالى جازعان ەدىك.

بۇعان دەيىن الكەي مارعۇلان اتىنداعى ارحەولوگيا ينستيتۋتىنىڭ عالىمدارى ارقارلى اسۋىن زەرتتەپ، تاڭبالى تاستار مەن وبالاردى، مىڭداعان جىل بۇرىنعى قونىستاردى تىركەپ، قاعاز بەتىنە تۇسىرگەنىن حابارلاعان ەدىك.

كەيىن ارقارلى پەتروگليفتەرىن ساقتاۋ مەملەكەتتىك ورگانداردىڭ باقىلاۋىنا الىنىپ، الماتى وبلىسىنىڭ جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ تىزىمىنە ەنگىزىلدى.

اۆتور

الما مۇقانوۆا

سوڭعى جاڭالىقتار