ارنايى ەكونوميكالىق ايماقتار ينستيتۋتى ءتيىستى دەڭگەيدە دامىماي وتىر - ۇكىمەت باسشىسى

استانا. KAZINFORM - ارنايى ەكونوميكالىق ايماقتار ينستيتۋتى ءالى كۇنگە دەيىن ءتيىستى دەڭگەيدە دامىماي وتىر. بۇل تۋرالى بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.

«جاھاندىق باسەكەلەستىك جاعدايىندا مەملەكەتتىك قولداۋ شارالارى ينۆەستيتسيا تارتۋدىڭ ماڭىزدى فاكتورى سانالادى. ءبىز ينۆەستيتسيالاردى جوعارى دەڭگەيدە وڭدەلگەن ونىمدەر شىعارۋعا، تەحنولوگيالار ترانسفەرتىنە جانە وندىرىستەردى لوكاليزاتسيالاۋعا بەلسەندى تۇردە باعىتتاۋىمىز كەرەك. بۇگىندە ينۆەستورلارعا سالىقتىق جەڭىلدىكتەر، كەدەندىك باجداردان بوساتۋ، زاتتاي گرانتتار بەرۋ، كەپىلدەندىرىلگەن تاپسىرىستى قامتاماسىز ەتۋ جانە تاعى باسقا دا ءتۇرلى پرەفەرەنسيالار بەرىلىپ وتىر. دەگەنمەن، قولداۋ قۇرالدارىن ءتيىمدى پايدالانۋ جانە ولاردىڭ ساپاسى بويىنشا سۇراقتار بار»، - دەدى ۇكىمەت باسشىسى.

ماسەلەن، ونىڭ اتاپ وتۋىنشە، ارنايى ەكونوميكالىق ايماقتار ينستيتۋتى ءالى كۇنگە دەيىن ءتيىستى دەڭگەيدە دامىماي وتىر. ال، وزىق ەلدەردىڭ كوپشىلىگى ارنايى ەكونوميكالىق ايماقتاردى ينۆەستيتسيا تارتۋدىڭ ءتيىمدى قۇرالىنا اينالدىرعان.

«دۇنيەجۇزىلىك بانكتىڭ دەرەكتەرىنە سۇيەنسەك، تارتىمدىلىعى جاعىنان سالىق جانە كەدەندىك جەڭىلدىكتەر تەك ءۇشىنشى جانە ءتورتىنشى ورىنداردا تۇر. ال، ءبىرىنشى پوزيتسيادا قولايلى اكىمشىلەندىرۋ جانە قاجەتتى ينفراقۇرىلىممەن قامتاماسىز ەتۋ قۇرالدارى ورنالاسقان. ءبىزدىڭ ارنايى ەكونوميكالىق ايماقتاردى رەفورمالاۋ ارەكەتىمىز ولاردىڭ تيىمدىلىگىن ارتتىرا الماي كەلەدى. سونداي-اق ءبىز باسقارۋشى كومپانيالاردى قامتاماسىز ەتۋگە قوماقتى بيۋدجەت قاراجاتىن جۇمساپ وتىرمىز. ءبىراق ولاردىڭ تاراپىنان ينۆەستيتسيا تۇرىندە ءتيىستى قايتارىم جوق»، - دەدى ولجاس بەكتەنوۆ.

اۆتور

مارلان جيەمباي