پارا بەرۋگە ارەكەتتەنگەنى ءۇشىن قانداي جازا قاراستىرىلعان
استانا. KAZINFORM - مەملەكەتتىك قىزمەتشى اقشانى الۋدان باس تارتقان جاعدايدا، وعان از سومادا پارا بەرۋگە ارەكەتتەنگەن ادامعا قىلمىستىق جاۋاپكەرشىلىك قاراستىرىلعان با؟ بۇل سۇراققا استانا قالالىق پروكۋراتۋراسى جاۋاپ بەردى.
— زاڭدى نەگىزدەر بولعان جاعدايدا، مەملەكەتتىك قىزمەتشى پارا الۋدان باس تارتقان كۇننىڭ وزىندە دە قىلمىستىق جاۋاپكەرشىلىك بولۋى مۇمكىن. زاڭسىز سىياقىنىڭ مولشەرى قىلمىستىق جاۋاپكەرشىلىكتى جۇزەگە اسىرۋعا كەدەرگى بولا المايدى»، - دەدى ەلوردا پروكۋرورىنىڭ كومەكشىسى نۇرداۋلەت ابۋوۆ استانا قالاسىنىڭ كوممۋنيكاتسيالار قىزمەتىندەگى بريفينگىدە.
وسى ورايدا ول ناقتى بولعان وقيعا بويىنشا مىسال كەلتىردى. استانادا قارالعان قىلمىستىق ىستەردىڭ بىرىندە ءبىر ازامات اكىمشىلىك حاتتاما تولتىرىلۋىنىڭ الدىن الۋ ماقساتىندا پاترۋلدىك پوليتسيا قىزمەتكەرىنە 10000 تەڭگە ۇسىنعان. پوليتسيا قىزمەتكەرى اقشانى الۋدان باس تارتتى. اتالعان ادامنىڭ ارەكەتى پارا بەرۋگە وقتالۋ رەتىندە سارالاندى. سوت وعان ايىپپۇل سالىپ، سونىمەن قاتار بەلگىلى ءبىر لاۋازىمداردى اتقارۋعا نەمەسە بەلگىلى ءبىر قىزمەت تۇرلەرىمەن اينالىسۋعا ءومىر بويىنا تىيىم سالدى.
— بۇل مىسال اكىمشىلىك جاۋاپكەرشىلىكتەن زاڭسىز جولدارمەن جالتارۋعا ارەكەت جاساۋدىڭ الدەقايدا اۋىر قىلمىستىق-قۇقىقتىق سالدارعا اكەپ سوقتىرۋى مۇمكىن ەكەنىن كورسەتەدى، — دەپ اتاپ ءوتتى پروكۋرور.
بۇعان دەيىن حابارلانعانداي، استانا قالاسىنىڭ پروكۋراتۋراسى قازاقستان زاڭناماسىنا سايكەس قانداي ارەكەتتەر سىبايلاس جەمقورلىققا بايلانىستى قىلمىستارعا جاتاتىنىن جانە ولار ءۇشىن قانداي جازا قاراستىرىلعانىن ءتۇسىندىردى.
