اقىلدى ساعاتتار جۇرەك ىرعاعى مەن ۇيقى كەزىندە تىنىستى باقىلايدى
استانا. KAZINFORM — قازاقستان رەسپۋبليكاسى دەنساۋلىق ساقتاۋ مينيسترلىگى ءوندىرۋشى كومپانيالارمەن تىكەلەي كەلىسىمدەر شەڭبەرىندە Apple Watch, Samsung Galaxy Watch جانە AirPods Pro قۇرىلعىلارىنداعى دەنساۋلىقتى باقىلاۋدىڭ يننوۆاتسيالىق فۋنكتسيالارىنا قولجەتىمدىلىكتى كەڭەيتتى.
ەندى قازاقستاندىقتار سمارت-ساعاتتارى مەن قۇلاققاپتارى ارقىلى ەلەكتروكارديوگرامما (ە ك گ) ءتۇسىرىپ، ارتەريالىق قان قىسىمىن ولشەي الادى، جۇرەك ىرعاعىنىڭ بۇزىلۋى مەن ۇيقى كەزىندەگى اپنوە ءقاۋپى تۋرالى حابارلامالار الىپ، سونداي- اق ەستۋ قابىلەتىن تەكسەرە الادى.
قول جەتكىزىلگەن كەلىسىمنىڭ ارقاسىندا بۇدان بىلاي Apple جانە Samsung كومپانيالارى ەنگىزەتىن بارلىق جاڭا مەديتسينالىق جانە پروفيلاكتيكالىق سەرۆيستەر ۇيلەسىمدى قۇرىلعىلاردا الەمنىڭ باسقا ەلدەرىندە رەسمي ىسكە قوسىلعان ساتتەن باستاپ قازاقستانداعى پايدالانۋشىلارعا دا قولجەتىمدى بولادى. بۇل رەتتە وڭىرلىك كىدىرىستەر مەن شەكتەۋلەر بولمايدى.
Apple Watch جانە Samsung Galaxy Watch-تىڭ ۇيلەسىمدى مودەلدەرىندە پايدالانۋشىلار ناقتى ۋاقىت رەجيمىندە ە ك گ ءتۇسىرىپ، اريتميا بەلگىلەرىن باقىلاي الادى جانە الىنعان ناتيجەلەردى سمارتفوندا ساقتاپ، كەيىن دارىگەرمەن تالقىلاي الادى. سونداي- اق ساعاتتار ۇيقى كەزىندەگى تىنىس الۋ ساپاسىن تالداۋ فۋنكتسياسىن قولدايدى جانە ىقتيمال اپنوە تۋرالى ەسكەرتەدى. بۇدان بولەك، Samsung سمارت- ساعاتتارىندا Samsung Health Monitor قوسىمشاسى ارقىلى ارتەريالىق قان قىسىمىن ولشەۋگە بولادى.
بۇل فۋنكتسيانى پايدالانۋ ءۇشىن قۇرىلعىنى مانجەتاسى بار تونومەتردىڭ كومەگىمەن ءار 28 كۇن سايىن الدىن الا كاليبرلەۋ قاجەت.
ال AirPods Pro قۇلاققاپتارىنىڭ يەلەرى «دەنساۋلىق» قوسىمشاسى ارقىلى ەستۋ قابىلەتىن تەكسەرە الادى، ال جەكە ەستۋ اپپاراتىنىڭ فۋنكتسياسى جەڭىل نەمەسە ورتاشا دارەجەدەگى ەستۋ قابىلەتىنىڭ تومەندەۋى بولۋى مۇمكىن ەرەسەك ادامدار ءۇشىن قورشاعان ورتاداعى دىبىستاردى اۆتوماتتى تۇردە بەيىمدەپ، كۇشەيتۋگە مۇمكىندىك بەرەدى.
جاڭا سەرۆيستەردى پايدالانۋ ءۇشىن پايدالانۋشىلار سمارتفوندارىنىڭ، سمارت- ساعاتتارى مەن قۇلاققاپتارىنىڭ باعدارلامالىق جاساقتاماسىن جاڭارتىپ، سودان كەيىن ءتيىستى فۋنكتسيانى قوسىمشادا باپتاۋى قاجەت.
دەنساۋلىق ساقتاۋ مينيسترلىگى تسيفرلىق قۇرىلعىلاردىڭ بۇل فۋنكتسيالارى كۇندەلىكتى پروفيلاكتيكا مەن ءوز دەنساۋلىعىن باقىلاۋعا ارنالعانىن اتاپ ءوتتى. الايدا ولار تولىققاندى مەديتسينالىق تەكسەرۋدى، دياگنوز قويۋدى جانە ماماننىڭ ەم تاعايىنداۋىن الماستىرمايدى.
ايتا كەتەلىك الماتىدا وكپە قاتەرلى ىسىگىنە روبوت اسسيستەنت كومەگىمەن العاشقى وتا جاسالدى.
