اقمولا وبلىسىندا جول اپاتىنان زارداپ شەككەن پوليتسەي قايتىس بولدى

اقمولا وبلىسى پوليتسيا دەپارتامەنتىنىڭ باسپا ءسوز قىزمەتى حابارلاعانداي، 4-قاراشادا پوليتسيا كاپيتانى دانيار تايەۆ اۋرۋحانادا كوز جۇمدى. ول قىزمەتتىك مىندەتىن اتقارىپ جۇرگەندە جول اپاتىنا ۇشىراعان.

— وسى وقيعاعا بايلانىستى قىلمىستىق ءىس قوزعالدى. JAC كولىگىنىڭ جۇرگىزۋشىسى ۇستالىپ، ۋاقىتشا ۇستاۋ يزولياتورىنا قامالدى. تەرگەۋ ءجۇرىپ جاتىر. ىشكى ىستەر مينيسترلىگىنىڭ باسشىلىعى مەن قىزمەتكەرلەرى قازا تاپقان پوليتسەيدىڭ وتباسى مەن جاقىندارىنا كوڭىل ايتادى، — دەپ حابارلادى ۆەدومستۆو.

جول اپاتىنان كەيىن پوليتسيا قىزمەتكەرى شورتاندى اۋداندىق اۋرۋحاناسىنا جەتكىزىلگەن. اقمولا وبلىسى دەنساۋلىق ساقتاۋ باسقارماسىنىڭ مالىمەتىنشە، ونىڭ جاعدايى اسا اۋىر بولعان. ەر ادام كوماعا تۇسكەن.

دارىگەرلەر ناۋقاستىڭ جاعدايىن بىرلەسىپ باعالاپ، ونى استاناداعى № 2 كوپبەيىندى وبلىستىق اۋرۋحاناعا اۋىستىرعان.

— دارىگەرلەر بارلىق قاجەتتى رەانيماتسيالىق شارانى جۇرگىزگەنىمەن، ناۋقاستىڭ ءومىرىن ساقتاپ قالا المادى. ول جول اپاتىنان العان اۋىر جاراقاتتارىنىڭ سالدارىنان قايتىس بولدى، — دەپ ءتۇسىندىردى دەنساۋلىق ساقتاۋ باسقارماسى.

ەسكە سالايىق، بۇعان دەيىن اقمولا وبلىسىنداعى تاسجولدا پوليتسيانىڭ قىزمەتتىك كولىگى جول اپاتىنا ۇشىراعان ەدى. JAC T9 كولىگىنىڭ جۇرگىزۋشىسى جىلدامدىقتى شەكتەن اسىرىپ، قاۋىپسىز اراقاشىقتىقتى ساقتاماي، پوليتسيا كولىگىنە سوقتىعىسقان. وقيعا كەزىندە پوليتسيا قىزمەتكەرلەرى ارنايى جول تەحنيكاسىن سۇيەمەلدەپ، جول قوزعالىسىنىڭ قاۋىپسىزدىگىن قامتاماسىز ەتىپ جۇرگەن.