اقتوبەدەگى جول اپاتى: ءۇش بالاسى مەن كۇيەۋىنەن ايرىلعان ايەل زاڭسىز تەرگەلگەن

اقتوبە. KAZINFORM - جول-كولىك اپاتى كەزىندە ءۇش بالاسى مەن كۇيەۋىنەن ايىرىلعان س. جاقسىلىقوۆا جازىقسىز جاۋاپقا تارتىلعانى ءۇشىن مورالدىق جانە ماتەريالدىق شىعىندى ءوندىرۋدى تالاپ ەتتى. سوت شەشىمىمەن وعان 3,3 ميلليون تەڭگە ءوندىرىلدى.

اقتوبە قالاسى №3 سوتىنىڭ باسپا ءسوز قىزمەتىنىڭ حابارلاۋىنشا، س. جاقسىلىقوۆا مورالدىق زيان مەن ادۆوكات ەڭبەگىن تولەۋگە جۇمسالعان شىعىنداردى ءوندىرۋ تۋرالى تالاپ-ارىز ءتۇسىردى.

- ايتەكە بي اۋداندىق سوتى ايىپتالۋشىنى اقتادى. سول كەزدە تالاپ قويۋشىعا قىلمىستىق جاۋاپكەرشىلىككە زاڭسىز تارتىلعانى ءۇشىن كەلتىرىلگەن زياندى وتەۋ قۇقىعى ءتۇسىندىرىلدى. سوت تالاپ قويۋشىنىڭ قوزعالىس ەركىندىگى شەكتەۋلى بولعانىن، بولعان وقيعادا وتباسىنان، ونىڭ ىشىندە ءۇش كامەلەتكە تولماعان بالاسىنان ايىرىلعانىن، باسىنان وتكەن مورالدىق ازاپتارىن ەسكەرە وتىرىپ، ونىڭ پايداسىنا 2000000 تەڭگە مورالدىق زيان جانە قىلمىستىق ءىس جۇرگىزۋ كەزىندە ادۆوكاتتىڭ ەڭبەگىن وتەۋگە كەتكەن 1300000 تەڭگە شىعىنىن ءوندىردى. سوتتىڭ شەشىمى زاڭدى كۇشىنە ەنگەن جوق، - دەپ حابارلادى اقتوبە قالاسى №3 سوتىنىڭ باسپا ءسوز قىزمەتى.

ەسكە سالساق، ايتەكە بي اۋداندىق سوتىندا قىلمىستىق كودەكستىڭ «ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول قوزعالىسى قاعيدالارىن بۇزۋ» بابى بويىنشا ءىس قارالدى.

ءىس ماتەريالىنا سۇيەنسەك، 2023 -جىلدىڭ 21 -اقپان كۇنى ساعات شامامەن 14:00-دە سوتتالۋشى ايەل جولداسى جانە 3 بالاسىمەن اقتوبە قالاسىنان ت. جۋرگەنوۆ اۋىلىنا باعىت العان. تەرگەۋشىلەر «Mitsubishi Montero Sport» ماركالى اۆتوكولىگىن ايداعان ايەل «سامارا- شىمكەنت» تاس جولىنىڭ 921 شاقىرىمىندا جولدىڭ قارسى باعىتىنا شىعىپ، تىركەمەسى بار «VOLVO» ماركالى جۇك كولىگىمەن سوقتىعىسقانىن تىركەدى.

وقيعا سالدارىنان بارلىق جولاۋشى، ياعني، ءۇش بالا مەن كۇيەۋى كوز جۇمدى.

اۆتور

التىناي ساعىندىقوۆا