اقتوبەدە ەسىرتكى دايىنداپ، ادام ولتىرگەن مەكتەپ مۇعالىمى سوتتالدى

اقتوبە. KAZINFORM - اقتوبەدە مەكتەپ مۇعالىمى مەن ءتىس تەحنيگى ەسىرتكى زاتتارىن دايىنداپ، ادام ولتىرگەنى ءۇشىن 19 جىلعا سوتتالدى. ءارقايسىسى جابىرلەنۋشىنىڭ وتباسىنا 10 ميلليون تەڭگەدەن مورالدىق وتەماقى تولەۋى ءتيىس.

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ءابىش كەكىلبايەۆ اتىنداعى № 72 جالپى ءبىلىم بەرەتىن ورتا IT مەكتەپ-ليتسەيىنىڭ مۇعالىمى مەن ءتىس تەحنيگىنە قاتىستى قىلمىستىق ءىس قارالدى. ەكەۋىنە «ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ» جانە «ادام ءولتىرۋ» باپتارى بويىنشا ايىپ تاعىلدى. ءىس ماتەريالىنا سۇيەنسەك، مەكتەپتىڭ تاريح ءپانىنىڭ مۇعالىمى دارحان جەتپىسبايەۆ پەن ءتىس تەحنيگى مەيرامبەك ءسۇيىنعارين 2023 -جىلدىڭ ناۋرىز ايى مەن 2024 -جىلدىڭ 13- قاڭتار ارالىعىندا گاراجدى جالعا الادى.

سوندا جاسىرىن لابوراتوريا جۇمىسىن جۇرگىزەدى. ولار مەفەدروندى زاڭسىز دايىنداعان جانە ساقتاعان. ەندى ساتۋ جولىن ويلاستىرىپ، تانىستارىن شاقىرادى. بىرەۋى بىردەن باس تارتىپ، ەكىنشىسى كەلىسەدى. الايدا ەكى ۇيىمداستىرۋشى قىلمىسى اشكەرە بولادى دەپ قورقىپ، جابىرلەنۋشى توقمۋرزيندى الداپ شاقىرادى. كەيىن پىشاقتاپ، ولتىرەدى.

- دارحان جەتپىسبايەۆ ايىپتى دەپ تانىپ، تۇپكىلىكتى 19 جىل باس بوستاندىعىنان ايىرۋ جازاسى تاعايىندالسىن. جازاسىن قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەسىن. مەيرامبەك ءسۇيىنعارين ايىپتى دەپ تانىلىپ، 19 جىل باس بوستاندىعىنان ايىرۋ جازاسى تاعايىندالسىن. جازاسىن قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەسىن، - دەدى سۋديا نۇرلان باقتىعاليەۆ.

سونداي-اق سوتتالۋشىلاردىڭ ءارقايسىسى جابىرلەنۋشى تاراپقا 10 ميلليون تەڭگەدەن مورالدىق وتەماقى تولەۋى ءتيىس.

اقتوبەدە كوللەدج ءبىلىم الۋشىلارىنىڭ وتىرىسى ءساتسىز اياقتالدى. ۇيگە كىرمەك بولعان جىگىتتىڭ الدىنان پىشاق الا شىققان قىزدى پوليتسيا انىقتاپ، بولىمگە جەتكىزدى.

التىناي ساعىندىقوۆا

اۆتور