اقتوبەدە مالدان قاراسان اۋرۋى انىقتالىپ، قىستاقتا كارانتين جاريالاندى

اقتوبە. KAZINFORM - ويىل اۋدانى شۇبارشي اۋىلى تاۋشانباز قىستاعىنداعى شارۋا قوجالىعىنىڭ مالىنان قاراسان انىقتالدى. قىستاقتا كارانتين جاريالاندى.

«ءماتجان» شارۋا قوجالىعىنىڭ باسشىسى 12-اقپان كۇنى قوپتوعاي اۋىلدىق وكرۋگىنىڭ ۆەتەريناريالىق پۋنكتىنە حابار بەرگەن. ول سول كەزدە 4 باس ءىرى قارانىڭ ولگەنىن ايتقان.

- بىردەن ۆەتەرينار ماماندار بارىپ، پاتولوگيالىق ماتەريال الىندى. ولگەن جانۋارلاردان الىنعان ماتەريال دياگنوز قويۋ ءۇشىن اقتوبە وبلىستىق ۆەتەريناريالىق زەرتحاناسىنا جىبەرىلدى. ۆەتەريناريالىق زەرتحانانىڭ ساراپتاما اكتىسىنىڭ ناتيجەسى بويىنشا قاراسانعا وڭ ناتيجە كورسەتتى. ولگەن جانۋارلاردىڭ ولەكسەسى مال قورىمىنا شىعارىلىپ جويىلدى، قالعان جانۋارلار ۆەتەرينارلىق مامانداردىڭ باقىلاۋىندا. 27-اقپاندا كوپتوعاي اۋىلدىق وكرۋگىنىڭ اكىمىنىڭ شەشىمىمەن «ءماتجان» شارۋا قوجالىعىندا ءمۇيىزدى ءىرى قارا مالدارىنىڭ اراسىندا قاراسان جۇقپالى اۋرۋىنىڭ انىقتالۋىنا بايلانىستى كارانتين بەلگىلەندى. ەپيزووتياعا قارسى وتريادى ساۋىقتىرۋ ءىس-شاراسىن جۇرگىزەدى، - دەپ حابارلادى اقتوبە وبلىستىق ۆەتەريناريا باسقارماسى. اقپاراتقا سۇيەنسەك، «ءماتجان» شارۋا قوجالىعىندا 243 باس ءىرى قارا، 700-دەن استام ۇساق مال مەن 7 باس جىلقى بار.

ەسكە سالساق، ەكى جىل بۇرىن العا اۋدانى توقمانساي اۋىلدىق وكرۋگىندە «ولەتتى» شارۋا قوجالىعىندا 9 باس ءىرى قارا ءولدى. كەيىن مالدىڭ قاراسان اۋرۋىنان ولگەنى انىقتالدى.

اۆتور

التىناي ساعىندىقوۆا