اقتوبەدە كەشەگى اتىس تۋرالى ەسكەرتۋدەن سوڭ وقۋشىلاردىڭ 85 پايىز مەكتەپكە بارمادى

اقتوبە. KAZINFORM - اقتوبەدە تەرروريزم اكتىسى تۋرالى حابارلامادان سوڭ ءبىرىنشى اۋىسىمدا وقيتىن بالالاردىڭ باسىم بولىگى ساباققا بارماي قالدى. ولارعا قوسىمشا تاپسىرما بەرىلىپ، ساباق ونلاين وتكىزىلدى.

اقتوبە وبلىستىق ءبىلىم باسقارماسىنىڭ مالىمەتى بويىنشا، اقتوبە قالاسىندا 119 مەكتەپ بار. ونىڭ 87- ءسى مەملەكەتتىك.

بۇگىن ءبىرىنشى اۋىسىمدا وقيتىن 57924 بالانىڭ 8558- ءى ساباققا كەلدى. بۇل - شامامەن وقۋشىلاردىڭ 15 پايىز. ال پوليتسيا كۇزەتتى كۇشەيتتى.

- اقتوبە قالاسىندا جاعداي تۇراقتى، الاڭداۋعا نەگىز جوق. جالپى ءبىلىم مەكەمەلەرى شتاتتىق رەجيمدە جۇمىس ىستەپ تۇر. ولاردىڭ قاۋىپسىزدىگىن پوليتسيا جاساقتارى قامتاماسىز ەتەدى. وقۋ ورىندارىندا، ونىڭ ىشىندە بەينەباقىلاۋ جۇيەسى ارقىلى قاۋىپسىزدىكتى قامتاماسىز ەتۋگە ەرەكشە كوڭىل ءبولىنىپ وتىر. جاساقتار ءبىلىم بەرۋ ۇيىمدارىنا بارىنشا جاقىن. ازاماتتاردان ارانداتۋعا بەرىلمەي، تەك رەسمي اقپاراتقا سەنۋدى سۇرايمىز، - دەپ حابارلادى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ەسكە سالساق، كەشە اقتوبە قالاسىنداعى مەكتەپتەرگە شابۋىل جاسالاتىنى تۋرالى حابارلاما تارادى. «كونەتس اكتوبە» تەلەگرام كانالىندا بەلگىسىز بىرەۋ اقتوبە مەكتەپتەرىندە تەررورلىق اكت جاسايتىنىن ايتىپ، حابارلاما تاراتتى. قازىرگى كەزدە بۇل جەردە تاپانشانىڭ فوتوسى مەن ۆيدەوسى، اشىق قوقان-لوققا سوزدەر جازىلىپ جاتىر. سونىمەن بىرگە العاشقى تىزىمگە №21 جانە №27 مەكتەپتەر الىنعانىن حابارلاپ، فوتوسىمەن بىرگە جاريالادى. كەيىننەن اقتوبە قالاسىنىڭ مەكتەپتەرىنە قاتىستى تەرروريزم اكتىسى تۋرالى كورىنەۋ جالعان حابارلاما تاراتقان كۇدىكتى انىقتالدى. ول جاقىن شەتەلدىڭ 18 جاستاعى ازاماتى بولىپ شىقتى.

- اقتوبە قالاسىنىڭ مەكتەپتەرىندە تەرروريزم اكتىسى تۋرالى كورىنەۋ جالعان حابارلاۋ فاكتىسى بويىنشا پوليتسيا قىزمەتكەرلەرىمەن جاقىن شەت ەلدەردىڭ ءبىرىنىڭ 18 جاستاعى تۇرعىنى انىقتالدى. ق ر قىلمىستىق- پروتسەستىك كودەكسىنىڭ 201-بابىنا سايكەس قىلمىستىق ءىستى تەرگەۋ شەڭبەرىندەگى وزگە دە اقپارات جاريا ەتۋگە جاتپايدى، - دەپ حابارلادى اقتوبە وبلىستىق پ د باسپا ءسوز قىزمەتى.

اۆتور

التىناي ساعىندىقوۆا