اقتوبە اۋىل شارۋاشىلىعى ستانساسىنىڭ بازاسىندا جىلقى شارۋاشىلىعى ينستيتۋتى قۇرىلادى

اقتوبە. KAZINFORM - اقتوبە وبلىسىنا جۇمىس ساپارى كەزىندە ۆيتسە-پرەمەر سەرىك جۇمانعارين جەرگىلىكتى اۋىل شارۋاشىلىعى تاجىريبە ستانساسىنا باردى.

بۇگىندە بۇل - اقتوبە وبلىسىنىڭ اگراريلەرى ءۇشىن ءداندى، جارما، مايلى جانە جەم-ءشوپ داقىلدارىنىڭ ەليتالىق جانە بىرەگەي تۇقىمدارىن وندىرۋگە رۇقساتى بار ايماقتاعى جالعىز اگرارلىق بەيىندەگى عىلىمي-زەرتتەۋ مەكەمەسى.

اقتوبە سەلەكسياسىنىڭ سۇرىپتارى قازاقستاننىڭ باسقا وبلىستارىندا جانە رەسەيدىڭ شەكارالاس ايماقتارىندا دا قولدانىلادى.

«ءوڭىر مال ازىعىن دايىنداۋعا جانە مال شارۋاشىلىعىنا ماماندانعان. ءبىزدىڭ سۇرىپتاردى جەمگە دە، ءداندى داقىلدارعا دا قولدانۋعا بولادى، ويتكەنى ولار ءتورت تۇلىكتىڭ اۋزىنا تۇسكەن كەزدە كوپ اقۋىز ءارى جاسىل ماسسا بولەدى. ءبىزدىڭ تارى بارلىق استىق ەگەتىن ايماقتاردا وسەدى. مەملەكەتتىك تىزىلىمدە تىركەلگەن 20 تارى سۇرىپىنىڭ جەتەۋىن اقتوبەلىك عالىمدار تاڭدادى»، - دەدى ا ش ت س باس ەكونوميسى گالينا بارانوۆا.

كاسىپورىن قازىر قيىن جاعدايعا تاپ بولىپ، قارىزدىق مىندەتتەمە ارقالاپ وتىر.

وسىعان بايلانىستى عىلىمي ازىرلەمەلەردى ودان ءارى دامىتۋ، قارجىلاندىرۋ جانە كوممەرتسيالاندىرۋ مۇمكىن ەمەس.

جاقىن ارادا كاسىپورىندى قالپىنا كەلتىرۋ ءۇشىن ونىڭ بازاسىندا جىلقى شارۋاشىلىعى جانە جەم-ءشوپ ءوندىرۋ ينستيتۋتى قۇرىلادى.

«مال شارۋاشىلىعى - اۋىل شارۋاشىلىعىنىڭ نەگىزگى باعىتتارىنىڭ ءبىرى، ءبىز قازىر وعان ۇلكەن ماڭىز بەرىپ وتىرمىز. جىلقى شارۋاشىلىعى ينستيتۋتى قۇرىلعاننان كەيىن اقتوبە وبلىسى قوستاناي، اداي جىلقىسى سياقتى اسىل تۇقىمدى، سپورتتىق جىلقىلاردى، سونداي-اق ەت باعىتىنداعى جىلقىلاردى زەرتتەيتىن ءارى دامىتاتىن ورتالىققا اينالادى»، - دەپ اتاپ ءوتتى سەرىك جۇمانعارين.

بۇگىنگى تاڭدا رەسپۋبليكادا جىلقىنىڭ 14 تۇقىمى كەزدەسەدى.

ەڭ كوپ تارالعاندارى - جابى، مۇعالجار جانە كوشىم جىلقىسى سەكىلدى قازاقى تۇقىم. ولار ەلدىڭ ءارتۇرلى ايماقتارىندا ءساتتى ءوسىرىلىپ جاتىر.

جالپى، جىلقى ءوسىرۋ جىل وتكەن سايىن سۇرانىسقا يە كاسىپكە اينالۋدا جانە جاڭا عىلىمي ازىرلەمەلەر مەن پاتەنتتەر اتالعان شارۋاشىلىقتىڭ دامۋىنا ىقپال ەتە تۇسەرى انىق.

اۆتور

جانات قاپالبايەۆا