اقتاۋلىقتار ءالى تەڭىزگە شومىلىپ ءجۇر
اقتاۋ. KAZINFORM - كۇنتىزبە بويىنشا كۇز كەلگەنىمەن، اقتاۋدا تەڭىز جاعاسىنداعى دەمالىس ماۋسىمى ءالى اياقتالعان جوق. تۇرعىندار مەن قالا قوناقتارى كاسپي جاعالاۋىنا بارىپ، كۇنگە قىزدىرىنىپ، سۋعا ءتۇسىپ ءجۇر.
مامانداردىڭ مالىمەتىنشە، بيىل تەڭىز جاعالاۋىنداعى دەمالىس ماۋسىمى قىركۇيەك ايىندا دا جالعاسىپ وتىر. جاعاجايلاردا شەزلونگ پەن شاتىر جالعا الىپ، تەڭىزدە جۇزەتىندەر بار.
تۇرعىنداردىڭ ءبىرى تەڭىزگە كۇزدە دە كەلەتىنىن ايتادى.
- اقتاۋدا تەڭىزگە تەك جازدا ەمەس، قىركۇيەكتە دە كەلۋگە بولادى. كۇن جىلى بولسا، سۋعا ءتۇسىپ، دەمالىپ قايتامىز. تەڭىزدىڭ اۋاسى دا جاقسى، - دەيدى نۇرلان ەسىمدى تۇرعىن.
قالاعا قوناق بولىپ كەلگەندەردىڭ اراسىندا دا كاسپي جاعالاۋىندا ۋاقىت وتكىزەتىندەر بار.
- اقتاۋعا ارنايى كەلىپ، تەڭىز جاعاسىن كورۋدى جوسپارلاعان ەدىك. كۇز كەلسە دە كۇن جىلى ەكەن. سوندىقتان تەڭىزگە ءتۇسىپ، جاعالاۋدا دەمالىپ جاتىرمىز، - دەيدى اتىراۋ وبلىسىنىڭ تۇرعىنى ايگۇل مۇراتوۆا.
ال جەرگىلىكتى تۇرعىنداردىڭ ءبىرى ءۇشىن تەڭىزگە بارۋ - ماۋسىمعا قارامايتىن ادەتكە اينالعان.
- ءبىز ءۇشىن تەڭىزگە بارۋ - كۇندەلىكتى دەمالىستىڭ ءبىر ءتۇرى. اۋا رايى قولايلى بولسا، كۇزدە دە، كوكتەمدە دە سۋعا شومىلا بەرەمىز. ويتكەنى، تەڭىز سۋى تۇزدى، دەنساۋلىققا پايدالى، - دەيدى اقتاۋلىق تۇرعىن نازگۇل بەكىش.
ايتا كەتەيىك، قۇتقارۋشىلار تۇرعىندار مەن قالا قوناقتارىن تەك ارنايى جابدىقتالعان جاعاجايلاردا شومىلۋعا شاقىرادى. سەبەبى، ماڭعىستاۋ وبلىسىندا سۋعا تۇسۋگە تىيىم سالىنعان ءبىرقاتار جاعالاۋ بار.
بۇعان دەيىن، بالقاش بيىلعى شومىلۋ ماۋسىمىندا 200 مىڭعا جۋىق تۋريست قابىلداعانىن جازعان بولاتىنبىز.
