اقتاۋداعى ۇشاق اپاتى: رەسەي ازەربايجاننىڭ سۇراقتارىن جاۋاپسىز قالدىرىپ وتىر

استانا. قازاقپارات - باكۋ-گروزنىي باعىتى بويىنشا ۇشىپ كەلە جاتىپ، اقتاۋ اۋەجايى ماڭىندا بولعان ۇشاق اپاتىنا قاتىستى جايت بەس اي بۇرىن بولسا دا رەسەي تاراپى تەرگەۋ بارىسى جونىندە ناقتى اقپارات ۇسىنباعان، دەپ حابارلايدى Ulysmedia.kz.

ازەربايجان تاراپى وسى ۋاقىت ىشىندە تەرگەۋگە بايلانىستى رەسەيگە اي سايىن سۇراۋ جىبەرىپ كەلەدى. الايدا رەسەيلىك تاراپ تەك ءتۇرلى سىلتاۋلار ايتىپ، ءىستى سوزبالاڭعا سالىپ وتىر. بۇل تۋرالى vesti.az باسىلىمى دەرەككوزىنە سىلتەمە جاساپ حابارلادى.

- وسى بەس اي ىشىندە رەسەي ەشقانداي تەرگەۋ ارەكەتىن جۇرگىزگەن جوق. اپاتقا جاۋاپتى بولۋى مۇمكىن تۇلعالاردىڭ ەشقايسىسى قاماۋعا الىنباعان، - دەدى دەرەككوز.

سونىمەن قاتار جاقىندا ازەربايجاننىڭ قۇقىق قورعاۋ ورگاندارى بۇل ىسكە بايلانىستى رەسەيلىك ارىپتەستەرىنە رەسمي حات جولداعان. الايدا ازىرگە ەشقانداي ناتيجە جوق.

- ازەربايجان تاراپى رەسەيدەن ناقتى ارەكەت كۇتۋدە، - دەپ جازدى باسىلىم.

بىلتىر 25-جەلتوقسان كۇنى اقتاۋ قالاسىنىڭ ماڭىندا Azerbaijan Airlines اۋەكومپانياسىنىڭ باكۋدەن گروزنىيعا باعىت العان جولاۋشىلار ۇشاعى اپاتقا ۇشىراپ، 38 ادام قازا تاپتى.

بورتتا 5 ەكيپاج مۇشەسىن قوسا العاندا 67 ادام بولعان. جولاۋشىلاردىڭ 6 قازاقستان، 42 ءسى ازەربايجان، 3 ەۋى قىرعىزستان، 16 سى رەسەي ازاماتى.29 ادام جاراقات الىپ، اۋرۋحاناعا جاتقىزىلدى، ولاردىڭ اراسىندا ەكى بالا بار. اپاتتان امان قالعاندار اراسىندا قازاقستاندىقتار جوق.