اقتاۋ پورتىنىڭ ءتۇبى تەرەڭدەتىلەدى
استانا. KAZINFORM - اقتاۋ حالىقارالىق تەڭىز ساۋدا پورتى ايلاعىنىڭ ءتۇبى 7,5 مەترگە دەيىن تەرەڭدەتىلەدى. الىنعان توپىراق جاعاداعى سۋى تايىز جەرلەرگە توسەلەدى. ناتيجەسىندە پورت اۋدانى 170 گەكتارعا ۇلعايىپ، جاڭا ايلاق سالىنادى.
بۇل تۋرالى كولىك ءمينيسترى مارات قارابايەۆ مالىمدەدى. ايتۋىنشا، سوڭعى كەزدە كاسپيدىڭ تەز تارتىلۋى كەمەمەن جۇك تاسىمالىنا كەرى اسەر ەتكەن. سۋ كولىكتەرىنىڭ قايىرلاپ قالۋ قاۋپى جوعارى بولعاندىقتان ولارعا مۇناي جانە وزگە دە تاۋارلار تولىق كولەمدە تيەلمەيدى. بيىل اقتاۋ تەڭىز پورتى ارقىلى 1355 توننا جۇك اۋىستىرىپ تيەلدى. بۇل بىلتىرعى جىلدىڭ وسى كەزەڭىمەن سالىستىرعاندا %20- كە ارتىق كورسەتكىش.
سونداي-اق بىلتىر ءبىرىنشى توقساندا 7 مىڭ كونتەينەر تاسىمالدانسا، جىل باسىنان بەرى 17 مىڭنان استام كونتەينەر جونەلتىلدى. قازاق استىعى، مۇناي، مەتال، باسقا دا تاۋارلار نەگىزىنەن يران، ازەربايجان، رەسەي مەن تۇرىكمەنستانعا تاسىمالدانادى. سوڭعى 10 جىلدا تەڭىزدىڭ كۇرت تارتىلۋى پورت قىزمەتىنە كەرى اسەر ەتكەن. ماماندار كەمەلەرگە جۇكتىڭ 10-15 پايىزعا دەيىن از تيەلەتىنىن ايتىپ وتىر.
ەربولات تىلەپيەۆ، «اقتاۋ تەڭىز ساۋدا پورتى» ۇ ك» ا ق ءبولىم باستىعى:
- قۇرعاق جۇكتەر 6 مىڭ توننا جۇكتەلسە، قازىر 5 مىڭ توننا جۇكتەيدى. ەگەر 6 مىڭ توننا جۇكتەسە وندا استى ءتيىپ قالادى. ەگەر وسى جىلدىڭ سوڭىنا دەيىن تەرەڭدەتۋ جۇمىستارىن جۇرگىزبەسەك، ودان ءارى قاراي تەرەڭدەپ باستاسا تەڭىزدىڭ دەڭگەيى، كەمەلىك تاسىمالداۋ رەنتابەلدىگى ازايادى. ءتيىمسىز بولادى.
جۋىردا اقتاۋدا قازاقستاندىق عالىمدار باس قوسىپ، ايماق الەۋەتىن ارتتىرۋدا وڭىرلىك عىلىمدى دامىتۋ ماسەلەلەرىن تالقىلادى. كاسپي دەڭگەيىنىڭ تايىزدانۋى كۇن تارتىبىندەگى نەگىزگى تاقىرىپتىڭ ءبىرى بولدى. كوشپەلى جيىندا بايانداما وقىعان كولىك ءمينيسترى مارات قارابايەۆ ەلدىڭ باستى تەڭىز ايلاعىندا ايلاقتاردىڭ ءتۇبىن تەرەڭدەتۋ مامىر ايىندا باستالادى دەدى.
بۇعان دەيىن قۇرىق تەڭىز ايلاعىندا دا تەڭىز سۋىنىڭ جاعادان شەگىنىپ كەتۋىنەن ءبىراز قيىندىق تۋىندادى. 2024 -جىلى 25 ميلليارد تەڭگەدەن استام قارجى ءبولىنىپ، 4 ايدا پورتتىڭ كىرەبەرىس كانالى 8 مەترگە تەرەڭدەتىلدى. ايتا كەتسەك، قۇرىق پورتى ارقىلى جىلىنا 6 ميلليون توننا جۇك تاسىمالدانادى. ونىڭ 4,1 ميلليون تونناسى ۆاگونمەن، 1,9 ميلليون تونناسى جۇك كولىگىمەن سۋ ايلاعىنا جەتكىزىلەدى.
24.kz
