اقتاۋ تۇركى الەمىنىڭ مادەني استاناسى بولادى
2025 -جىلى اقتاۋ تۇركى الەمىنىڭ مادەني استاناسى بولادى. بۇل تۋرالى قازاقستاننىڭ حالىقارالىق تۇركىسوي ۇيىمىنداعى وكىلى باقىتجان وماروۆ ءمالىم ەتتى، دەپ حابارلايدى Kazinform.
ماڭىزدى شەشىم ازەربايجاننىڭ شۋشا قالاسىندا وتكەن اتالعان ۇيىمعا مۇشە مەملەكەتتەردىڭ مادەنيەت مينيسترلەرى باس قوسقان جيىندا قابىلداندى.
«وسى جيىندا قازاقستاننان بولەك، قىرعىزستان جانە وزبەكستان، سولتۇستىك كيپر، تۇركيا وزدەرىن ۇسىندى. ءبىراق كوپشىلىك داۋىسپەن قازاقستاننىڭ اقتاۋ قالاسى جەڭىپ شىقتى. تۇركى الەمىنىڭ تەاتر فەستيۆالى، سۋرەتشىلەر باسقوسۋى، ياعني تۇركى الەمىنە قاتىستى مادەني شارالاردىڭ ءبارى اقتاۋ قالاسىندا وتەدى. مادەني استانانىڭ اشىلۋى مەن جابىلۋ سالتاناتىنا ۇلكەن كونسەرت ۇيىمداستىرىلادى. 2024 -جىلدىڭ باسىندا وتەتىن تۇركىسوي ۇيىمىنىڭ 41-وتىرىسىندا اقتاۋ قالاسىنىڭ اكىمشىلىگى جيىنعا كەلىپ، ءوزىنىڭ تانىستىرىلىمىن جاساۋى ءتيىس»، - دەدى باقىتجان وماروۆ «ماڭعىستاۋ» تەلەارناسىنا بەرگەن سۇحباتىندا.
كاسپي جاعالاۋىنا جينالىپ، ءتۇرلى ءىس- شارالار وتكىزۋ ءوڭىردىڭ تۋريستىك الەۋەتىن ارتتىرماق. بۇعان دەيىن ەلىمىزدەگى تۇركى الەمىنىڭ مادەني استانالارى استانا مەن تۇركىستان بولعان.
اۆتور
ينديرا ساتەنباي
