اقتاۋ ماڭىنداعى ۇشاق اپاتى: رەسەيدە، قازاقستاندا جانە ازەربايجاندا قىلمىستىق ءىس قوزعالدى
استانا. KAZINFORM - ازەربايجاننىڭ باس پروكۋرورى كامران اليەۆ اقتاۋ ماڭىندا ازەربايجان اۋە كومپانياسى ۇشاعىنىڭ اپاتقا ۇشىراۋىنا قاتىستى قازاقستان مەن رەسەيدىڭ ءتيىستى قۇرىلىمدارى - پروكۋراتۋرا جانە قۇقىق قورعاۋ ورگاندارىمەن بىرلەسىپ تەرگەۋ جۇرگىزىپ جاتقانىن مالىمدەدى.

بۇل تۋرالى Trend.az حابارلادى.
-ازەربايجان باسشىسى يلحام اليەۆتىڭ تاپسىرماسىمەن اقتاۋ ماڭىنداعى AZAL ۇشاعىنىڭ اپاتقا ۇشىراۋىن تەرگەۋگە بايلانىستى بارلىق مۇددەلى مەملەكەتتىك ورگاندار جۇمىلدىرىلىپ، ءوز مىندەتتەرىنە سايكەس تاپسىرمالاردى ورىنداپ جاتىر. اۋە اپاتىنا قاتىستى ءۇش ەلدە قىلمىستىق ءىس قوزعالدى: رەسەي، قازاقستان جانە ازەربايجان. قازاقستان، ازەربايجان جانە رەسەيدىڭ ءتيىستى ورگاندارى دالەلدەمەلەردى جينادى، كەيىننەن ولارعا قىلمىسكەرلەردى انىقتاۋ ءۇشىن بىرلەسىپ تالداۋ جاسالادى. قازىرگى ۋاقىتتا رەسەيدىڭ تەرگەۋ كوميتەتى مەن باس پروكۋراتۋراسى بۇل باعىتتا ءتيىستى تەرگەۋ امالدارىن جۇرگىزىپ جاتىر، - دەدى كامران اليەۆ.
ايتا كەتەيىك، 25 -جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن.
بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالدى.
اۆتور
ەركەجان سماعۇلوۆا