اقتاۋ ماڭىنداعى ۇشاق اپاتى: ازەربايجان پروكۋرورلارى گروزنىيعا كەلدى
استانا. KAZINFORM - بۇل تۋرالى ازەربايجان باس پروكۋراتۋراسىنىڭ باسپا ءسوز قىزمەتىنىڭ رەسمي مالىمدەمەسىندە ايتىلعان.
- ازەربايجان رەسپۋبليكاسىنىڭ پرەزيدەنتى يلحام اليەۆتىڭ تاپسىرماسىنا سايكەس، اقتاۋ قالاسىنىڭ ماڭىنداعى جولاۋشىلار ۇشاعىنىڭ اپاتقا ۇشىراۋ فاكتىسى بويىنشا قوزعالعان قىلمىستىق ءىستىڭ وبەكتيۆتى شىندىعىن انىقتاۋ ءۇشىن شۇعىل جانە قاجەتتى شارالار قابىلدانىپ جاتىر.
وسى ماقساتتا باس پروكۋراتۋرانىڭ ءبىر توپ قىزمەتكەرلەرى گروزنىي قالاسىنا جىبەرىلىپ، رەسەي فەدەراتسياسىنىڭ باس پروكۋراتۋراسىمەن جاسالعان كەلىسىمگە سايكەس وسى مەكەمەدەگى ارىپتەستەرىمەن بىرلەسىپ تەرگەۋ جانە باسقا دا پروتسەسسۋالدىق ارەكەتتەردى جۇرگىزەدى، - دەلىنگەن ۆەدومستۆو حابارلاماسىندا.
بۇعان دەيىن ازەربايجان باس پروكۋرورىنىڭ ورىنباسارى ەلمار دجامالوۆتىڭ جەتەكشىلىگىمەن قازاقستانعا تەرگەۋ توبىن جىبەرگەن بولاتىن. ازەربايجان تاراپى سونداي-اق قازاقستان رەسپۋبليكاسىنىڭ باس پروكۋراتۋراسىنان ءىس بويىنشا ءتيىستى تەرگەۋ جانە باسقا دا قاجەتتى پروتسەسسۋالدىق ارەكەتتەردى جۇرگىزۋ ءۇشىن قۇقىقتىق كومەك كورسەتۋدى سۇرادى.
جەلتوقساننىڭ 26- كۇنى ق ر پرەمەر-ءمينيسترىنىڭ ورىنباسارى قانات بوزىمبايەۆ رەسەي مەن ازەربايجاننىڭ قۇقىق قورعاۋ ورگاندارىنا قىلمىستىق ءىستى تەرگەۋگە (ق ر قىلمىستىق- پروتسەستىك كودەكسىنە سايكەس) قاتىسۋعا رۇقسات بەرىلمەيتىنىن، الايدا ۇشاق اپاتىنا قاتىستى ىسكە قاتىسۋعا رۇقسات ەتىلەتىنىن ايتتى.
سونداي-اق، برازيليادان اقتاۋعا ۇشاق ءوندىرۋشى Embraer كومپانياسىنىڭ تاعايىندالعان وكىلدەرى كەلدى.
ەركەجان سماعۇلوۆا
اۆتور
