اقتاۋ اۋەجايىندا ەسىرتكى جۇتىپ العان ەكى شەتەل ازاماتى ۇستالدى

استانا. قازاقپارات- 2024-جىلعى 24-قاڭتاردا اقتاۋ قالاسىنىڭ حالىقارالىق اۋەجايىندا ۇ ق ك ماڭعىستاۋ وبلىسى بويىنشا دەپارتامەنتىنىڭ جەدەل قىزمەتكەرلەرى مەن شەكاراشىلار ەسىرتكى تاسىمالدادى دەگەن كۇدىكپەن ەكى شەتەلدىك ازاماتتى ۇستادى.

وسى جولاۋشىلاردىڭ ءىش قۋىسىنا رەنتگەنوسكوپيالىق زەرتتەۋ بوگدە زاتتاردىڭ بار ەكەنىن كورسەتتى.

ارنايى مەديتسينالىق تاسىلدەرمەن شەتەلدىكتەردىڭ اسقازاندارىنان اپيىن توبىنىڭ ەسىرتكىسىنەن تۇراتىن 295 كونتەينەر شىعارىلدى.

الىنعان زاتتاردىڭ جالپى سالماعى 2 ك گ- دان اسادى.

سوت شەشىمىمەن فيگۋرانتتارعا قاماۋدا ۇستاۋ تۇرىندەگى بۇلتارتپاۋ شاراسى تاڭدالدى.

قىلمىستىق كودەكستىڭ 286-بابى 4-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.

وزگە اقپارات ق ر قىلمىستىق-پروتسەستىك كودەكسىنىڭ 201-بابى 1-بولىگىنە سايكەس جاريا ەتۋگە جاتپايدى.

اۆتور

ەربول جانات