اقسۋ شاتقالىن ەندى جاڭا كورۋ الاڭىنان تاماشالاۋعا بولادى
استانا. قازاقپارات- اقسۋ-جاباعىلى قورىعىنا كەلەتىن تۋريستەر ءۇشىن جاڭا مۇمكىندىك پايدا بولدى. ەندى كەلۋشىلەر تەرەڭدىگى 500 مەترگە دەيىن جەتەتىن اقسۋ شاتقالىنىڭ كەڭ پانوراسىن ارنايى جاڭا كورۋ الاڭىنان تاماشالاي الادى.
اقسۋ-جاباعىلى مەملەكەتتىك تابيعي قورىعىنا كەلۋشىلەر ءۇشىن جاڭا تۋريستىك نىسان اشىلدى. ەندى ساياحاتشىلار تەرەڭدىگى 500 مەترگە دەيىن جەتەتىن ايگىلى اقسۋ شاتقالىنىڭ كەڭ پانوراسىن ارنايى كورۋ الاڭىنان تاماشالاي الادى.
جاڭا نىسان اقسۋ-جاباعىلى قورىعىنىڭ 100 جىلدىق مەرەيتويى اياسىندا اشىلدى.
اقسۋ قۇز-شاتقالى — قورىق اۋماعىنداعى ەڭ تانىمال تابيعي نىسانداردىڭ ءبىرى. ونىڭ تەرەڭدىگى كەي جەرلەردە 300- 500 مەترگە جەتسە، جوعارعى بولىگىنىڭ ەنى 800 مەترگە دەيىن سوزىلادى. شاتقالدىڭ تىك جارتاستارى مەن اينالاسىنداعى تابيعي لاندشافت كەلۋشىلەرگە ەرەكشە كورىنىس ۇسىنادى.
جاڭا كورۋ الاڭى تۋريستەرگە شاتقالدى قاۋىپسىز جەردەن تاماشالاپ، ونىڭ تابيعي ەرەكشەلىكتەرىن جاقىنىراق كورۋگە مۇمكىندىك بەرەدى. سونىمەن قاتار نىسان تابيعاتتى تاماشالاۋ كەزىندە قاۋىپسىزدىكتى قامتاماسىز ەتۋگە جانە قورىقتاعى ەكولوگيالىق تۋريزمدى دامىتۋعا باعىتتالعان.
اقسۋ-جاباعىلى قورىعى — ورتالىق ازياداعى ەڭ كونە قورىقتاردىڭ ءبىرى. ونىڭ قۇرىلعانىنا بيىل 100 جىل تولىپ وتىر. مەرەيتوي اياسىندا قورىقتىڭ تابيعي مۇراسىن تانىتۋعا جانە كەلۋشىلەر ءۇشىن تۋريستىك ينفراقۇرىلىمدى دامىتۋعا باعىتتالعان جوبالار جۇزەگە اسىرىلۋدا.
جاڭا كورۋ الاڭى دا وسى جۇمىستاردىڭ ءبىر بولىگى. ەندى قورىققا كەلگەن تۋريستەر اقسۋ شاتقالىنىڭ اۋقىمىن جاڭا نۇكتەدەن تاماشالاپ، تابيعي كورىنىستى اسەرلى راكۋرستان كورە الادى.
بۇعان دەيىن اقسۋ-جاباعىلىدا جابايى تابيعات ءبىر عاسىر بويى قورعالىپ كەلە جاتقانىن جازعان ەدىك.
