اقمارال ءالنازاروۆا ءماسىموۆتىڭ رۋى تۋرالى اقپاراتقا قاتىستى پىكىر ءبىلدىردى
استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆتىڭ رۋى تۋرالى الەۋمەتتىك جەلىدە تاراعان اقپارات تۋرالى پىكىر ءبىلدىردى.
«اراي تولەمىسوۆا دەيتىن مەديتسينا دوكتورى YouTube ارنالاردىڭ بىرىنە بەرگەن سۇحباتتا مەديتسينالىق قۇجاتتاردان ك. ءماسىموۆتىڭ رۋى نايمان ەكەنىن كورگەنىن ايتتى. مەديتسينالىق قۇجاتتاردا شىنىمەن دە ادامنىڭ رۋى تۋرالى مالىمەت جازىلا ما؟ ادامنىڭ جەكە دەرەكتەرىن كوپشىلىككە جاريالاۋ قانشالىقتى زاڭدى؟» - دەپ سۇرادى جۋرناليست.
مينيستر ول سۇحباتتى كورمەگەندىكتەن، ماسەلەنى زەرتتەپ بارىپ ناقتى مالىمەت بەرە الاتىنىن ايتتى.
«مەن ول YouTube ارناسىنداعى سۇحباتتى كورگەن جوقپىن. قوسىمشا انىقتاپ ايتايىق. نەگىزى رۋدىڭ مەديتسينالىق قۇجاتتاردا جازىلۋىنا بايلانىستى ەشقانداي شارت جوق. سوندىقتان قوسىمشا اقپارات كەرەك بولسا، تاعى زەرتتەپ ايتايىق»، - دەدى اقمارال ءالنازاروۆا.
اۆتور
ەسىمجان ناقتىباي
