اقشا جەتپەسە، باسىپ شىعارىڭىزدار: ۇلتتىق بانك دەپۋتاتتار ۇسىنىسىنا جاۋاپ بەردى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ ءماجىلىس دەپۋتاتتارىنىڭ ساۋالىنا جولداعان جاۋاپتا اۋىل شارۋاشىلىعىن قولداۋ ءۇشىن قامسىزداندىرىلماعان اقشا باسىپ شىعارۋ نەگە مۇمكىن ەمەس ەكەنىن ءتۇسىندىردى.

- ورتالىق بانكتىڭ «اقشا باسىپ شىعارۋدىڭ» ماقساتتارى مەن كولەمدەرىنە قاراماستان ەكونوميكانى ىنتالاندىرۋى - تىكەلەي تەرىس سالدارى بار ەكونوميكالىق شارا. ونىڭ سالدارىنان ينفلياتسيالىق پروتسەستەر ورىستەيدى. بۇل باعا تۇراقتىلىعىن ساقتاۋعا قايشى كەلەدى. كوپتەگەن ەلدىڭ ەكونوميكالىق مودەلدەرى مەن پراكتيكالىق تاجىريبەسى قامسىزداندىرىلماعان ەميسسيانىڭ ەكونوميكالىق وسۋگە تەرىس اسەر ەتەتىندىگىن ايقىن كورسەتەدى. ياعني، «اقشانى باسىپ شىعارۋ» ۇكىمەت پەن ۇلتتىق بانكتىڭ ماكروەكونوميكالىق جانە الەۋمەتتىك تۇراقتىلىق جولىنداعى بارلىق ءىس-ارەكەتتەرى مەن قول جەتكىزگەن پروگرەسىن جويىپ جىبەرۋى مۇمكىن، - دەگەن ۇلتتىق بانك باسشىسى حالىقارالىق تاجىريبەدەن ۆەنەسۋەلا مەن زيمبابۆەنىڭ وقيعاسىن مىسالعا كەلتىرگەن.

بۇل ەلدەردە بيۋدجەت تاپشىلىعىن جابۋ ءۇشىن ورتالىق بانكتەر قوسىمشا اقشا ماسساسىن باسىپ شىعارىپ، سالدارىنان ميلليونداعان پايىزدىق ينفلياتسيالار تىركەلگەن بولاتىن.

- ەكونوميكانىڭ كەز كەلگەن باسقا سەگمەنتى سياقتى اۋىل شارۋاشىلىعىن قارجىلاندىرۋ ءۇشىن ۇسىنىلىپ وتىرعان نىسانالىق ەميسسيا مۇمكىن ەمەس. اقشا سەكتور ىشىندە قالماي، ۇسىنىس پەن ءوندىرىس كولەمى اراسىنداعى تەڭگەرىمسىزدىكتى تۋدىرىپ، ەكونوميكانىڭ بارلىق باسقا سەكتورلارىنا ەنەدى. بۇل ءوز كەزەگىندە ينفلياتسيالىق پروتسەستەردىڭ وسۋىنە جانە ۇلتتىق ۆاليۋتانىڭ ساتىپ الۋ قابىلەتىنىڭ تومەندەۋىنە اكەلەدى. بۇل پروتسەستەر حالىقتىڭ ەڭ وسال توپتارىنا اسەر ەتەدى، ويتكەنى ينفلياتسيا بارلىعىنا ىقپال ەتىپ، تابىس نەعۇرلىم تومەن بولسا، ونىمەن كۇرەسۋ سوعۇرلىم قيىن بولادى. سوندىقتان ينفلياتسيا «كەدەيلەرگە سالىناتىن سالىق» دەپ اتالادى، - دەپ جازادى تيمۋ سۇلەيمەنوۆ.

وتكەن اپتادا ۇلتتىق بانك باسقارماسى ۆاليۋتالىق رەتتەۋ ماسەلەلەرىنە قاتىستى وزگەرىستەردى بەكىتكەن ەدى.

اۆتور

ەسىمجان ناقتىباي