اقپان ايى قيىن بولماق: ا ش م شارۋالارعا ۇندەۋ جولدادى
استانا. KAZINFORM - اۋىل شارۋاشىلىعى مينيسترلىگى اقپان ايىندا كۇننىڭ كۇرت سۋۋ بولجامىنا بايلانىستى شارۋالارعا ۇندەۋ جاريالادى.

- اۋا رايىنا نازار اۋدارۋدى جانە شالعايداعى مالدىڭ قىستاۋىن قامتاماسىز ەتۋ ءۇشىن قاجەتتى شارالار قابىلداۋدى سۇرايمىز. اقپان ايى مال وسىرۋشىلەر ءۇشىن قيىن بولماق. «قازگيدرومەت» دەرەكتەرىنە سايكەس، قازاقستاننىڭ باسىم بولىگىندە ورتاشا اۋا تەمپەراتۋراسى -10 -16 گرادۋسقا دەيىن تومەندەمەك. ال اتىراۋ، قىزىلوردا، جامبىل، الماتى، جەتىسۋ وبلىستارىندا، باتىس قازاقستان، ماڭعىستاۋ، اقتوبە وبلىستارىنىڭ وڭتۇستىك- ھباتىسىندا جانە تۇركىستان وبلىسىنىڭ سولتۇستىك جارتىسىندا -1 -9 گرادۋس بولادى دەپ كۇتىلۋدە.
سونىمەن قاتار ماڭعىستاۋ وبلىسىنىڭ وڭتۇستىك-باتىسىندا، تۇركىستان وبلىسىنىڭ وڭتۇستىگىندە 0، +3 گرادۋس تومەندەۋى كۇتىلۋدە، - دەلىنگەن مينيسترلىك تاراتقان حابارلامادا.
اقپاراتتا ايتىلعانداي، اقپان ايىندا ەلىمىزدىڭ باسىم بولىگىندە جاۋىن-شاشىن مولشەرى نورمادان جوعارى بولادى.
ونىڭ ىشىندە ماڭعىستاۋ جانە تۇركىستان وبلىستارىنىڭ باسىم بولىگىندە، اتىراۋ، اقتوبە، قوستانايدىڭ سولتۇستىگىندە، سولتۇستىك- قازاقستاننىڭ سولتۇستىك- باتىسىندا، ۇلىتاۋ وبلىسىنىڭ وڭتۇستىك- باتىسىندا، قىزىلوردا وبلىسىنىڭ سولتۇستىك جارتىسىندا، جامبىل وبلىسىنىڭ وڭتۇستىك- باتىس جارتىسىندا نورماعا جاقىن بولادى.
- وسىعان بايلانىستى مالدى جىلى جانە قۇرعاق قورادا ۇستاۋ كەرەكتىگىن سۇرايمىز. جەمشوپ مولشەرىن كوبەيتىڭىز، ويتكەنى سۋىقتا جانۋارلار دەنە تەمپەراتۋراسىن ۇستاپ تۇرۋ ءۇشىن كوپ ەنەرگيانى قاجەت ەتەدى. جەمشوپ قورىن تەكسەرىڭىز، كۇن رايىنىڭ كۇرت وزگەرۋى جەمنىڭ قولجەتىمدىلىگى مەن ساپاسىنا اسەر ەتۋى مۇمكىن. بۇلاقتىڭ قاتىپ قالۋىن بولدىرماڭىز جانە تازا سۋ بەرىڭىز.
سونىمەن قاتار مالدىڭ جاعدايىن تەكسەرىپ وتىرىڭىز، - دەيدى اۋىل شارۋاشىلىعى مينيسترلىگىنەن.
ەسكە سالا كەتەيىك، بىلتىر جازدا ەلىمىزدە مال شارۋاشىلىعىنىڭ ونىمدىلىگىن ارتتىرۋدى سۋبسيديالاۋ قاعيدالارىنا وزگەرىستەر ەنگىزىلدى.
اۆتور
داۋلەت ىزتىلەۋ