اندجەلينا دجولي برەد پيتتتى فيزيكالىق زورلىق-زومبىلىق جاسادى دەپ ايىپتادى

استانا. KAZINFORM - الەمگە ايگىلى امەريكالىق اكتريسا اندجەلينا دجولي بۇرىنعى كۇيەۋى برەد پيتتكە قارسى سوتقا جاڭا شاعىم ءتۇسىردى. بۇل تۋرالى Bazaar باسىلىمى سوت ماتەريالدارىنا سۇيەنە وتىرىپ حابارلادى.

ايتا كەتەيىك، دجوليدىڭ ادۆوكاتتارى برەد پيتتتىڭ اكتريسا مەن ونىڭ بالالارىنا زورلىق-زومبىلىق كورسەتكەنىن ايتىپ، لوس-اندجەلەس جوعارعى سوتىنا قۇجاتتاردى تاپسىرعان.

بەلگىلى بولعانداي، 2016 -جىلدىڭ قىركۇيەگىندە برەد پيتت فرانسيادان لوس-اندجەلەسكە قايتىپ كەلە جاتقاندا بۇرىنعى ايەلى مەن بالالارىن قورلاعان. The New York Times باسىلىمىنىڭ جازۋىنشا، پيتت بالالاردىڭ ءبىرىن تۇنشىقتىرىپ، ەكىنشىسىن ۇرىپ، دجوليدىڭ باسىنان ۇستاپ، شايقاعان. اندجەلينانىڭ وسى وقيعادان كەيىن اجىراسۋعا ارىز بەرگەنى بەلگىلى بولدى.

ادۆوكاتتار پيتتتىڭ دجوليگە الىمجەتتىك كورسەتۋى وسى وقيعادان بۇرىن باستالعانىن ايتادى.

«برەد ىستەگەن ءىسى ءۇشىن جاۋاپكەرشىلىكتى ءوز موينىنا الدى، ءبىراق ول جاساماعان ءىسى ءۇشىن ەمەس»، - دەپ جاۋاپ بەردى پيتتتىڭ ادۆوكاتى.

اۆتور

جاراسقان نۇرىبايەۆ