امەريكالىق وقۋشىلار ءارىپ تانىمايدى - الەمنىڭ ءبىلىم بەرۋ جۇيەسىندەگى وزگەرىستەر

استانا. KAZINFORM - بيىلعى جاڭا وقۋ جىلىندا الەم ەلدەرىنىڭ ءبىلىم بەرۋ جۇيەسىندە ءبىراز وزگەرىس بولادى، دەپ حابارلايدى 24kz.

ماسەلەن، ا ق ش تەلەفون ۇستاۋعا تىيىم سالىپ جاتىر. ال، بريتان مەكتەپتەرى كەيبىر پاندەردىڭ وقىتۋ فورماتىنا وزگەرىستەر ەنگىزەدى. قازىر قوعامدى جايلاعان جاعىمسىز جايتتار كوپ. جاس ۇرپاعىنىڭ قامىن ويلاعان ەلدەر الدىمەن مەكتەپتە دۇرىس ءبىلىم بەرۋگە دەن قويىپ وتىر. سونىمەن، بيىلعى جاڭا وقۋ جىلىندا قانداي وزگەرىستەر بار؟

انگليا وقۋشىلارى مەديا ساۋاتتىلىقتى ۇيرەنەدى

بيىل انگليا مەكتەپتەرىندە مەديا ساۋاتتىلىق نەگىزدەرى، دالىرەك اياتقاندا، ەكسترەميزم مەن Fake news تۋرالى تەرەڭدەتىلىپ وقىتىلادى. قازىر بريتانيا ءبىلىم مينيسترلىگى «قاستاندىق تەورياسى» اتتى وقۋ باعدارلاماسىن جان- جاقتى تالقىلاپ جاتىر. بۇل ارنايى ءپان رەتىندە وقىتىلمايدى، بازادا بار پاندەرگە قوسىلادى. ماسەلەن، اعىلشىن ءتىلى ساباعىندا گازەت-جۋرنال بەتىنە جاريالانعان ماقالالاردى تالدايدى. ال، ينفورماتيكا ساباعىندا جاڭالىقتار سايتىنداعى اقپاراتتارعا شولۋ جاسايدى. ماتەماتيكادا ستاتيستيكالىق، سيفرلىق تالداۋلار قامتىلادى. بۇل كەيىنگى ۋاقىتتا بريتانيادا بەلەڭ العان تارتىپسىزدىكتەردەن كەيىن بەكىتىلگەن شارالاردىڭ ءبىر پاراسى.

الەۋمەتتىك جەلىدە، عالامتوردا تاراعان اقپاراتتىڭ انىق-قانىعىنا كوز جەتكىزىپ، قايسىسى جالعان، قايسىسى ناقتى دەرەكتەرمەن بەرىلگەنىن وقۋشى اجىراتا ءبىلۋى كەرەك. سەبەبى، وسكەلەڭ ۇرپاقتىڭ ساناسىن ۋلايتىن دۇنيەلەر تولىپ جاتىر. سوندىقتان ءار وقۋشى كەز كەلگەن جاعدايدا دۇرىس شەشىم قابىلداي الاتىنداي، سىني ويلاۋ قابىلەتىن جاستايىنان قالىپتاستىرۋ كەرەك.

امەريكالىق وقۋشىلار ءارىپ تانىمايدى

ال، نيۋ- يوركتەگى مەملەكەتتىك مەكتەپتەر باستاۋىش سىنىپتارداعى ءبىلىم بەرۋ باعدارلاماسىن تۇبەگەيلى وزگەرتپەك. ويتكەنى ميلليونداعان بالا ءجوندى وقي المايدى. كەيىنگى 10 جىلدىقتا وقۋ جۇيەسىندەگى كەي ادىستەر ەسكىرگەن.

ستاتيستيكاعا سۇيەنسەك، ا ق ش- تاعى 3-8 -سىنىپ وقۋشىلارىنىڭ %51- ءى ءارىپ تانىمايدى، قارا ناسىلدىلەردىڭ %64- ءى، يسپان ءتىلدى وقۋشىلاردىڭ %63- ءى وقۋ سىناقتارىنان وتە المايدى. ءبىلىم دەپارتامەنتىنىڭ ۇلتتىق ءبىلىم بەرۋ پروگرەسىن باعالاۋ (NAEP) مالىمەتتەرى بويىنشا ءتورتىنشى سىنىپ وقۋشىلارىنىڭ شامامەن ۇشتەن ءبىرى نەگىزگى دەڭگەيدە نەمەسە ودان تومەن دەڭگەيدە وقيدى.

مەكتەپتەردە وقۋدى ۇيرەتۋ ءادىسى كوپ ۇزاماي 180 گرادۋسقا وزگەرەدى. ارىپتەردى تانۋ ءۇشىن سۋرەتتەردى قولدانۋعا ۇيرەتەتىن جۇيەدەن، فونەتيكاعا نەگىزدەلگەن جۇيەگە دەيىن. بۇل قادام نيۋ-يوركتى ۇلتتىق ساۋاتتىلىق داعدارىسىمەن كۇرەسۋدىڭ الدىڭعى قاتارىنا شىعارادى.

ءار ەلدىڭ ءبىلىم بەرۋ جۇيەسى ءارتۇرلى

الەم ەلدەرىنىڭ ءبىلىم بەرۋ جۇيەسىندە ءبارىمىز بىلەتىن ماتەماتيكا، ادەبيەت، تاريح سىندى پاندەردەن تىس، بىزگە تاڭسىق، مىندەتتى پاندەر كوپ. ماسەلەن، گەرمانيادا «باقىت ساباعى» بار. يسپانيادا «ەموتسيونالدى تاربيە»، جاپونيادا «تابيعاتقا ءسۇيسىنۋ»، اۆستراليادا «سەرفينگ» ساباقتارى بار. ال، يزرايلدە كيبەرقاۋىپسىزدىككە بالالاردى مەكتەپ قابىرعاسىندا باۋليدى. بۇل قوسىمشا ەمەس، زاڭ جۇزىندە ءبىلىم بەرۋ جۇيەسىنە ەنگىزىلگەن ساباقتار. ءيا، ءار ادامنىڭ جەكە تۇلعا بولىپ قالىپتاسۋىندا مەكتەپتە العان ءبىلىم مەن تاربيە ماڭىزدى ءرول اتقارادى.

اۆتورى: فاريزا جانعانايەۆا