امەريكالىق ساراپشى قازاق كاسىپكەرلەرىنە قىمىز ەكسپورتتاۋعا كەڭەس بەردى

ا ق ش اق ءۇي جانىنداعى قورعانىس دەپارتامەنتىنىڭ كەڭەسشىسى، ستراتەگيالىق جانە حالىقارالىق زەرتتەۋلەر ورتالىعىنىڭ اعا كەڭەسشىسى ەدۆارد ليۋتتۆاك قازاقستاندىق ونىمدەردەن قىمىز ۇنايتىنىن، الايدا ونى ۆاشينگتوندا ەش جەردە ساتىپ الا المايتىنىن ايتتى، دەپ حابارلايدى Kazinform.

Astana Club فورۋمىندا تىلشىلەرگە بەرگەن سۇحباتىندا ساراپشى حالىقارالىق قاقتىعىستاردىڭ ورتالىق ازيا ەلدەرىنىڭ ەكونوميكاسىنا قالاي اسەر ەتكەنىن ايتتى.

«ارينە، تىكەلەي ەمەس، ءبىراق جاناما تۇردە ورتالىق ازيا ەكونوميكاسى بۇل قاقتىعىستان زارداپ شەگىپ وتىر. ءبىراق مەن مىناداي ماڭىزدى نارسەنى ايتقىم كەلەدى: ورتالىق ازيادا ەكونوميكانى ينتەرناتسيونالداندىرۋ كەرەك. بۇل قازىرگى ۋاقىتتا ەكسپورت جەتكىلىكتى كولەمدە بولۋى كەرەك دەگەندى بىلدىرەدى. قازاقستاندا، ورتالىق ازيادا ەكسپورت كولەمى تومەن. مىسالى، ماعان قىمىز سۋسىنى وتە ۇنايدى. ءبىراق مەن ونى ۆاشينگتوندا ساتىپ الا المايمىن. قازاقتاردىڭ وزدەرى بيزنەسكە باعدارلانعان، ەكسپورتقا بەت بۇرعان بولۋى كەرەك. ەكسپورتتايتىن ەكونوميكالار عانا تابىستى بولادى. مىسالى، قىمىزدى ەرەكشە سۋسىن رەتىندە كوپ ادام ساتىپ الار ەدى. بۇل جەردە اڭگىمە قانداي قاقتىعىستار بولىپ جاتقانىنا، كۇشتىڭ تەپە-تەڭدىگىنە بايلانىستى ەمەس، كاسىپكەرلىك قابىلەت جونىندە. بۇل رەسەيگە نەمەسە بەيجىڭگە بايلانىستى ەمەس، قازاقتاردىڭ كاسىپكەرلىك قابىلەتى مەن بيزنەسكە باعدارلانۋىنا بايلانىستى»، - دەپ اتاپ ءوتتى ەدۆارد ليۋتتۆاك.
سونىمەن بىرگە، حالىقارالىق ساراپشى قازاقستاننىڭ قازىرگى جاعدايدا جۇرگىزىپ وتىرعان ساياساتى تۋرالى دا ايتتى.
«ساياسي تۇرعىدا قاسىم-جومارت توقايەۆ ءوزىن ساياساتكەر رەتىندە وتە جاقسى كورسەتتى. سونىمەن قاتار، رەسەيدە موبيليزاتسيا باستالعاندا ءبىز كوپتەگەن جاس رەسەيلىكتەردىڭ قازاقستانعا كەلگەنىن كوردىك. قازاقستاندا بيۋروكراتيا از. ولار تەز ارادا ءتۇرلى قۇجاتتارىن، قاعازدارىن راسىمدەي الدى. ءوز كەزەگىندە بۇل جاس ىسكەر رەسەيلىكتەردى وسىندا كەلىپ، بيزنەس باستاۋعا، جۇمىس ىستەۋگە تارتا الدى. قازاقستاننىڭ گەوگرافيالىق ورنالاسۋىنا بايلانىستى مۇمكىنشىلىكتەرى ونشا كوپ ەمەس. دەگەنمەن قازاقستان قولدا بار مۇمكىندىكتەرىن جاقسى پايدالانا الدى»، - دەپ تولىقتىردى ەدۆارد ليۋتتۆاك.
ايتا كەتەيىك، ەلوردادا ءداستۇرلى Astana Club فورۋمى ءوتىپ جاتىر.
بۇل فورۋم - جىل سايىن كورنەكتى ساياسي قايراتكەرلەردى، ديپلوماتتاردى، بەدەلدى عالىمداردى جانە الەمدەگى ەڭ ءىرى تالداۋ ورتالىقتارىنىڭ جەتەكشى ساراپشىلارىن جينايتىن حالىقارالىق پىكىرتالاس الاڭى.
اۆتور
ايجان سەرىكجان قىزى