الپىس مىڭعا جۋىق تۇرعىنى بار قارابۇلاق اۋىلى نەگە قالا مارتەبەسىن العىسى كەلمەيدى

استانا. قازاقپارات - 60 مىڭعا جۋىق تۇرعىنى بار قارابۇلاق اۋىلى تۇرعىندارى ەلدى مەكەنگە قالا مارتەبەسىن بەرۋگە قارسى. بۇل تۋرالى تۇركىستان وبلىسىنىڭ اكىمى دارحان ساتىبالدى ايتتى.

بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ تۇركىستان وبلىسىنىڭ اكىمى دارحان ساتىبالدىدان: «ەلىمىزدەگى ەڭ ۇلكەن ەلدى مەكەننىڭ ءبىرى - قارابۇلاق اۋىلى. وندا 60 مىڭعا جۋىق ادام تۇرادى. بۇل اۋىلعا قاتىستى نە ايتاسىز؟ ونىڭ مارتەبەسىن وزگەرتەمىز بە؟»، - دەپ سۇراعان ەدى.

وبلىس اكىمىنىڭ ايتۋىنشا، قارابۇلاق - سايرام اۋدانىنداعى حالقى تىعىز ورنالاسقان اۋىلداردىڭ ءبىرى.

«قازاقستاننىڭ اكىمشىلىك اۋماقتىق قۇرىلىسى تۋرالى» زاڭعا سايكەس وبلىستىق جانە اۋداندىق ماڭىزى بار قالاعا جاتقىزۋ ءۇشىن ءىرى ەكونوميكالىق جانە مادەني ورتالىقتار بولىپ سانالاتىن دامىعان وندىرىستىك جانە الەۋمەتتىك ينفراقۇرىلىمى بار ەلدى مەكەندەر كىرەدى. ستاتيستيكالىق مالىمەتتەرگە سايكەس، قارابۇلاق اۋىلىنىڭ حالىق سانى 53 مىڭنان اسادى. اۋىلدا 20 مەكتەپ، 14 جەكەمەنشىك بالاباقشا، 2 كوللەدج، 9 دەنساۋلىق ساقتاۋ مەكەمەسى، 1 مادەنيەت ءۇيى قىزمەت كورسەتەدى. قارابۇلاق - اگرارلى اۋىل. اۋدان بويىنشا وندىرىلەتىن اۋىل شارۋاشىلىعى ونىمدەرىنىڭ 30 پايىزى وسى اۋىلعا تيەسىلى»، - دەدى ءوڭىر باسشىسى.

ونىڭ اتاپ وتۋىنشە، 2023 -جىلدىڭ قورىتىندىسى بويىنشا 42 ميلليارد تەڭگەگە اۋىل شارۋاشىلىعى ونىمدەرى ءوندىرىلدى. اۋدان بويىنشا ءىرى قارا مال باسىنىڭ 47 پايىزى قارابۇلاق اۋىلىنا تيەسىلى.

«اۋداندىق ماڭىزى بار نەمەسە وبلىستىق ماڭىزى بار مارتەبەسىن بەرگەن جاعدايدا اۋىل تۇرعىندارى ءبىرقاتار مۇمكىندىكتەن شەكتەلەدى. ولار - ۇ ب ت كەزىندە وقۋشىلارعا بەرىلەتىن اۋىلدىق كۆوتا، «ديپلوممەن اۋىلعا» باعدارلاماسى بويىنشا جاس ماماندارعا كورسەتىلەتىن الەۋمەتتىك قولداۋ، «اۋىل اماناتى» باعدارلاماسى، «اۋىل - ەل بەسىگى» باعدارلاماسى اياسىندا الەۋمەتتىك ينفراقۇرىلىمدىق جوبالار. قالا مارتەبەسىن العان جاعدايدا اۋىل تۇرعىندارىنىڭ نەگىزگى كاسىبى - مال شارۋاشىلىعىن دامىتۋعا مۇمكىندىك بولماي قالۋى ىقتيمال. ەلدى مەكەنگە اۋداندىق ماڭىزى بار قالا مارتەبەسىن بەرۋ تۋرالى جەرگىلىكتى تۇرعىندارمەن كەزدەسۋ وتكىزىپ، بۇل ماسەلەنى تالقىلادى. ولاردىڭ ءبارى قارسى بولىپ وتىر. ءبىز دە مۇنى ءتيىمسىز دەپ ويلايمىز»، - دەدى دارحان ساتىبالدى.

اۆتور

مارلان جيەمباي