دەمالىس جانە مەرەكە كۇندەرى تۇرعىن ءۇي سەكتورىندا رەيدتەر جۇرگىزىلمەك

- جىل سايىن جىلۋ بەرۋ كەزەڭىندە ءورت قاۋپى ارتا تۇسەدى. تۇرعىندار پەش جاعىپ، ءتۇرلى جىلىتۋ قۇرالدارىن پايدالانادى. الايدا كوپ جاعدايدا ءورت قاۋىپسىزدىگىنىڭ قاراپايىم تالاپتارىن ساقتاۋعا جەتكىلىكتى كوڭىل بولىنبەيدى. جۇرگىزىلىپ جاتقان پروفيلاكتيكالىق ءىس- شارالارعا قاراماستان، قاۋىپسىزدىك ماسەلەلەرىنە قاتىستى تۇرعىنداردىڭ جەكە جاۋاپكەرشىلىك دەڭگەيى ارتپاي وتىر. سۋىق تۇسە قايعىلى جاعدايلارعا اكەپ سوعاتىن ءورت سانى كوبەيەدى. وتكەن قىستا مۇنداي وقيعالار از بولعان جوق، ونىڭ ىشىندە ادامدار زارداپ شەگىپ، قازا تاپقان جاعدايلار دا بولدى. قازىرگى ۋاقىتتا تۇرعىن ءۇي سەكتورىندا ءورت سانى %12- عا تومەندەدى. الايدا بۇل پروفيلاكتيكالىق شارالاردى باسەڭدەتۋگە نەگىز بولماۋعا ءتيىس. جىلۋ بەرۋ ماۋسىمى ەندى باستالدى. كۇز ءبىرشاما جىلى بولعانىمەن، ناعىز سۋىق كۇندەر ءالى الدا. توتەنشە جاعدايلار مينيسترلىگىنە ءورت قاۋىپسىزدىگى سالاسىنداعى ءتۇسىندىرۋ جانە پروفيلاكتيكالىق شارالارىن كۇشەيتۋدى تاپسىرامىن، - دەدى و. بەكتەنوۆ.

ونىڭ ايتۋىنشا، ۆولونتەرلەر مەن قوعام وكىلدەرىن جۇمىلدىرا وتىرىپ، حالىقتىڭ قاۋىپسىزدىك مادەنيەتىن ارتتىرۋعا باعىتتالعان جۇمىستاردى جانداندىرا ءتۇسۋ كەرەك. وقۋ ورىندارىندا ءورت قاۋىپسىزدىگى شارالارى بويىنشا ينتەراكتيۆتى ساباقتار مەن ءتۇسىندىرۋ جۇمىستارىن ۇيىمداستىرۋ قاجەت. ءبىلىم الۋشىلار ءورت كەزىندە قالاي ارەكەت ەتۋ كەرەكتىگىن ناقتى بىلۋگە ءتيىس.

- بۇل - وقۋ-اعارتۋ، عىلىم جانە جوعارى ءبىلىم، توتەنشە جاعدايلار مينيسترلىكتەرىنىڭ مىندەتى. دەمالىس جانە مەرەكە كۇندەرى تۇرعىن ءۇي سەكتورىندا رەيدتەر جۇرگىزىپ، ءۇي-جايلاردى ارالاۋ كەرەك. اتالعان جۇمىسقا اكىمدىكتەر مەن ىشكى ىستەر ورگاندارىنىڭ قىزمەتكەرلەرىن جۇمىلدىرعان ءجون. توتەنشە جاعدايلار مينيسترلىگى تەك فورمالدى ۇسىنىس-نۇسقاۋلار بەرۋمەن شەكتەلمەۋگە ءتيىس. ءورت قاۋىپسىزدىگى تالاپتارىن بۇزعانى ءۇشىن بارىنشا پارمەندى شارالار قابىلداۋ قاجەت، - دەدى ۇكىمەت باسشىسى.

بۇعان دەيىن حابارلانعانداي، قازاقستاندا تۇرمىستىق گاز باللوندارىنا مىندەتتى تاڭبالاۋ ەنگىزىلەدى.