الەمدەگى زاماناۋي مەملەكەتتىڭ ۇلگىلەرى ۇلكەن سىناقتان ءوتىپ جاتىر - بايمەنوۆ

سۇحبات بارىسىندا «مەملەكەتتىك ورگان - ول حالىققا قىزمەت كورسەتەتىن سەرۆيس پە الدە بۇيرىق بەرەتىن جابىق كاستا بولۋى كەرەك پە؟» دەگەن سۇراق قويىلدى. ء ا. بايمەنوۆ بۇل سۇراق جالپى جاھان ءۇشىن وزەكتى ەكەنىن ايتتى.

- قازىر تەك ەكىنشى دۇنيەجۇزىلىك سوعىستان كەيىن قالىپتاسقان حالىقارالىق قارىم-قاتىناس ەرەجەلەرى، حالىقارالىق ساۋدا قاعيدالارى عانا ەمەس، زاماناۋي مەملەكەتتىڭ ۇلگىلەرى دە ۇلكەن سىناقتان ءوتىپ جاتىر. بۇل - دەموكراتيانىڭ وزىنە دە ۇلكەن سىناق. وسى تۇرعىدان العاندا، مەملەكەتتىك قىزمەت پەن مەملەكەتتىك اپپارات - ول ۇزاق مەرزىمدى مەملەكەتتىڭ مۇددەسىن قورعاۋ ءۇشىن جۇمىس ىستەۋى كەرەك پە الدە ءبىر سايلاۋدان كەلەسى سايلاۋعا دەيىن ءوزىنىڭ الدىنا قويعان ماقساتتارى بار ساياسي قىزمەتشىلەردىڭ مۇددەسىن قورعاۋ ءۇشىن جۇمىس ىستەۋى ءتيىس پە؟ بۇل ديلەمما قازىرگى الەمدەگى مەملەكەتتىك باسقارۋ جۇيەسى دامۋىندا وتە وزەكتى. «ساياساتكەر كەلەسى سايلاۋدى ويلاسا، مەملەكەت قايراتكەرى - كەلەر ۇرپاقتى ويلايدى» دەگەن ءسوز بار. سايلاۋ ارقىلى جەڭىسكە جەتكەن پارتيالاردىڭ بارلىعى بىردەي كەلەر ۇرپاقتى ويلاي بەرمەيدى. سونداي- اق سايلاۋ ارقىلى جەڭىسكە جەتكەن لاۋازىم يەلەرىنىڭ كەيبىرىنە مۇنداي قابىلەت بەرىلمەگەن، - دەدى ءاليحان بايمەنوۆ.

بۇدان بولەك ول مەملەكەتتىك قىزمەتتەگى كاسىبي ماماندارعا قاتىستى پىكىر ايتتى.

- ساياسي مەملەكەتتىك قىزمەتشى - سەنىمنىڭ نەگىزىندە تاعايىندالاتىن ادام. ءمينيستردى تاعايىنداۋ الدىندا ونى ەمتيحاننان ەشكىم وتكىزبەيدى. ونداي تاجىريبە الەمدە جوق. ءبىراق ونىڭ قاراماعىنداعى كاسىبي ماماندار مينيسترگە دۇرىس كەڭەس بەرىپ وتىرۋى كەرەك، سونىمەن قاتار ونىڭ قابىلداعان ءاربىر شەشىمىنىڭ سالدارى قالاي بولاتىنىن الدىن الا بولجاپ ايتۋى ءتيىس، - دەدى استانا مەملەكەتتىك قىزمەت حابى باسقارۋ كوميتەتىنىڭ ءتوراعاسى.

بۇعان دەيىن حابارلانعانداي، ءاليحان بايمەنوۆ تەرمينكوم مۇشەلەرى قانداي شەت تىلدەرىن ءبىلۋى كەرەكتىگىن ايتتى.