پاۆلودارلىق ءتىل جاناشىرى پسيحيكالىق ناۋقاستاردى ەمدەيتىن مەكەمەدەن شىعارىلدى

тіл жанашыры
Фото: Өркен Жоямерген

پاۆلودار. KAZINFORM - ءتىل جاناشىرى، قوعام بەلسەندىسى رۋزا بەيسەنبايتەگى پسيحياتريالىق ەمحانادان شىقتى. كەشەدەن بەرى بۇل جاڭالىق قازاق ءتىلدى قوعام اراسىندا ۇلكەن دۇرلىگىس تۋىنداتقان ەدى.

رۋزا بەيسەنبايتەگىنىڭ پسيحيكالىق ناۋقاستاردى ەمدەيتىن مەكەمەدەن بوساتىلعانى تۋرالى العاشقى بولىپ پاۆلودار وبلىستىق ءماسليحاتىنىڭ دەپۋتاتى اسىلبەك تۋعانباي مالىمدەدى.

«كەشەلى بەرى كوزىقاراقتى جۇرتشىلىق پاۆلودارلىق بەلسەندى، ءتىل جاناشىرى رۋزا بەيسەنبايتەگىنىڭ جاعدايىنا الاڭداۋلى بولعانى تۇسىنىكتى. ءدال قازىر رۋزا اپاي پسيحياتريالىق ەمحانادان بوساتىلدى. جاعدايى جاقسى. ول كىسىگە قاتىستى ماسەلەگە بارلىعىمىز الاڭدادىق. شامامىز كەلگەنشە ناقتى اقپارات الىپ وتىرۋعا تىرىستىق. قۇزىرلى مەكەمەلەرمەن ۇنەمى بايلانىستا بولدىق. ءار وڭىردەن قانشاما ادام حابارلاستى. بارشا جاناشىر اعايىنعا العىس بىلدىرەمىز»، - دەپ حابارلادى اسىلبەك تۋعانباي.

ر. بەيسەنبايتەگىنىڭ مەكەمەدەن شىعارىلعانى تۋرالى اقپاردى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى راستادى.

«ورتالىق دارىگەرلەرى تاراپىنان ناۋقاسقا ەكى كۇن بويى ەم قابىلداۋ شارالارى جاسالدى. مەديتسينا قىزمەتكەرلەرىنىڭ قاراۋىنان كەيىن دەنساۋلىق جاعدايىنىڭ جاقسارۋىنا وراي، كونسيليۋم شەشىمىمەن ناۋقاس ديسپانسەرلىك باقىلاۋ ۇسىنىسىمەن ۇيىنە قايتارىلدى.

دەنساۋلىق ساقتاۋ سالاسىنداعى زاڭناماعا سايكەس، الداعى ۋاقىتتا ناۋقاستىڭ پسيحيكالىق اۋىتقۋلارى ناشارلاپ، اينالاسىنداعى ادامدارعا زيان كەلتىرۋ ىقتيمالدىعى قايتا بايقالعان جاعدايدا، ول ەمدەۋگە جىبەرىلەتىن بولادى» دەپ جازىلعان باسقارمانىڭ رەسمي حابارلاماسىندا.

ەسكە سالا كەتەيىك، كەشە پاۆلودارلىق ءتىل جاناشىرى پسيحيكالىق ناۋقاستاردى ەمدەيتىن مەكەمەگە جاتقىزىلدى.

اۆتور

مۇرات اياعان

سوڭعى جاڭالىقتار