پاۆلوداردا اسانالى ءاشىموۆتىڭ مۋزەي- كابينەتى اشىلدى
پاۆلودار. KAZINFORM - بۇقار جىراۋ اتىنداعى ادەبيەت جانە ونەر مۋزەيىندە قازاق كينوسىنىڭ اڭىزى اسانالى ءاشىموۆتىڭ جەكە زاتتارى قويىلعان كابينەت اشىلدى. وندا اكتەردىڭ كيگەن شاپانى، شاحمات تاقتاسى، ۇستەل ءۇستى جيىنتىقتارى جانە وزگە دە پايدالانعان جەكە زاتتارى، فوتوسۋرەتتەرى قويىلعان.
اسانالى ءاشىموۆ - قازاق كينوسىن الەمدىك دەڭگەيگە كوتەرگەن اكتەرلەردىڭ ءبىرى. تەاتر سالاسىندا دا مايتالماننىڭ ەڭبەگى جارقىراپ كورىندى. مۋزەي- كابينەتتىڭ اشىلۋ سالتاناتىندا اكتەردىڭ ءوزى اتاپ وتكەندەي، «ونەردىڭ جانى - قۇشتارلىق، جاۋى - ءىشتارلىق».
«ونەر ولكەسىندە اتىڭ ەستىلە باستاسا، دۇشپانىڭ كوبەيەتىنى بولمىسىمىزدا بار. ادام سىنمەن وسەدى، ايتىس-تارتىستا شىڭدالادى. شاربولاتتاي ابدەن جەتىلىپ شىعىپ، ونەردىڭ كوگىندە قالىقتاتاتىن شابىت شىركىننىڭ تاۋسىلماعانى ابزال. بۇگىن ەرەكشە تولقىپ وتىرمىن. بۇقار جىراۋ مۋزەيى مەن ءۇشىن ايرىقشا سىي جاسادى. جاستىق شاعىمداعى، كينو مەن تەاترداعى ۇمىت بولعان كەيبىر ەستەلىكتەر ويعا قايتا ورالىپ وتىر. سيرەك فوتوسۋرەتتەردى كوردىم. مۋزەيدىڭ بۇل مۋزەي- كابينەتى مەنىڭ جەكە تۇلعاما ەمەس، قازاق كينوسىنا جاساپ وتىرعان تارتۋى دەپ ۇعىندىم. كەرەكۋدىڭ توپىراعى قۇيقالى، جۇمات شانينداي ۇلتتىق تەاتر ونەرىنىڭ نەگىزىن سالۋشى تۇلعانى، شاكەن ايمانوۆتاي قازاق كينوسىنىڭ اتاسىن دۇنيەگە كەلتىردى. قانشاما تەاتر جانە كينو اكتەرلەرى، ونەر ادامدارى ءوسىپ شىقتى. سول اتالارىمىزدىڭ قاسيەتتى رۋحى بۇگىنگى ۇرپاقتى جەلەپ- جەبەپ، ەلدىڭ ازاماتتارى ونەردى كوتەرىپ جاتقانى مەنى ايرىقشا قۋانتادى. مۋزەي دەگەن وتكەندى جۇرتپەن تابىستىرۋ، رۋحانياتتى ناسيحاتتاۋ بولسا، بۇگىنگى ونەگەلى ءىس وسى ۇدەدەن تولىقتاي شىعىپ وتىر»، - دەپ العىسىن جەتكىزدى اسانالى ءاشىم ۇلى.
اكتەردىڭ قاتىسۋىمەن كوپتەگەن كينوكارتينا پاۆلودار وبلىسىنىڭ باياناۋىل اۋدانىندا تۇسىرىلگەن. ولاردىڭ اراسىندا «قوزى كورپەش - بايان سۇلۋ» سياقتى قازاق كينوسىنىڭ شەديەۆرىن اتاپ وتۋگە بولادى. جەر بەدەرى كوركەم، فيلم تۇسىرۋگە جايلى ولكەگە كەزىندە شاكەن ايمانوۆ، سونداي- اق وزگە دە رەجيسسەرلەر وزدەرىنىڭ ءتۇسىرىلىم توپتارىن ءجيى اكەلگەن.
بۇقار جىراۋ اتىنداعى ادەبيەت جانە ونەر مۋزەيىنىڭ باسشىسى ەربول قايىروۆ كابينەتتى اشۋداعى ماقسات جۇرتشىلىقتى ەسىمى اڭىزعا اينالعان اسانالى ءاشىموۆتىڭ ونەر جولىمەن تانىستىرىپ، جاستارعا ۇلگى ەتۋ ەكەنىن اتاپ ءوتتى.
ەسكە سالا كەتەيىك، پاۆلوداردا «ەرتىس- بايان» 1- رەسپۋبليكالىق تەاتر فەستيۆالى باستالدى.
اۆتور
مۇرات اياعان
