پاۆلودار وبلىسى اكىمىنىڭ ءبىرىنشى ورىنباسارى جول- كولىك اپاتىنا ۇشىرادى
پاۆلودار وبلىسى اكىمىنىڭ ءبىرىنشى ورىنباسارى سەرىك باتىرعوجينوۆ مايقايىڭ-پاۆلودار اۆتوجولىندا قىزمەتتىك اۆتوكولىگىمەن جول اپاتىنا ۇشىرادى، دەپ حابارلايدى Kazinform.
جول-كولىك اپاتىنىڭ بولعانى تۋرالى پاۆلودار وبلىسى اكىمى باسپا ءسوز قىزمەتىنىڭ باسشىسى سالتانات اكىمبەكوۆا راستادى. وقيعا 9-قاڭتار كۇنى بولعان. سەرىك بارلىباي ۇلى مايقايىڭداعى وقيعا بويىنشا قۇرىلعان جەدەل شتابتىڭ مۇشەسى رەتىندە التىن كەنىشىندە جۇرگەن. سول كۇنى كەشكىلىك قىزمەتتىك كولىگىمەن پاۆلودار قالاسىنا جولعا شىعادى. اسفالتتىڭ تايعاق بولۋىنان جەڭىل تەحنيكا جۇرگىزۋشىگە باعىنباي، جولدان شىعىپ كەتىپ، اۋناعان.
«پاۆلودار وبلىسى اكىمىنىڭ ءبىرىنشى ورىنباسارى سەرىك باتىرعوجينوۆتىڭ كولىك جۇرگىزۋشىسى ءدىن امان. تەك سەرىك باتىرعوجينوۆ ازداپ جەڭىل جاراقات العان. دەنساۋلىعىنا ءتونىپ تۇرعان ەشقانداي قاتەر جوق»، - دەيدى باسپا ءسوز قىزمەتىنىڭ باسشىسى.
ال وڭىرلىك پوليتسيا دەپارتامەنتى اتالعان جول-كولىك وقيعاسى جايىندا جول پوليتسياسىندا ەشقانداي دەرەك تىركەلمەگەنىن حابارلادى.
سەرىك باتىرعوجينوۆ اتالعان لاۋازىمدى 2023 -جىلدىڭ قاراشا ايىنان اتقارىپ كەلەدى. بۇعان دەيىن بىرنەشە اۋداننىڭ باسشىسى، پاۆلودار وبلىسى اكىمىنىڭ ورىنباسارى قىزمەتىندە بولعان.
اۆتور
مۇرات اياعان
