پاۆلوداردا جۇرگىزۋشىدەن پارا سۇراپ، بوساتىپ جىبەرگەن پوليتسەي سوتتالدى

پاۆلودار قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىندە كورسەتىلگەندەي، 2026 -جىلعى مامىردا پاۆلودار — ومبى تاسجولىندا پوليتسيا قىزمەتكەرى جول قوزعالىسى ەرەجەسىن بۇزعان جۇرگىزۋشىنى توقتاتقان. ول قارسى قوزعالىس جولاعىنا شىعىپ، جولداعى تۇتاس سىزىقتى كەسىپ وتكەن.

تەكسەرۋ بارىسىندا جۇرگىزۋشى تۋىسىنا قوڭىراۋ شالىپ، كومەك سۇراعان. ونىڭ تۋىسى پوليتسيا ينسپەكتورىمەن تانىس بولىپ شىققان. ول ينسپەكتوردان جۇرگىزۋشىنى جاۋاپكەرشىلىكتەن بوساتۋدى وتىنگەن. پوليتسەي بۇعان كەلىسكەنىمەن، 30 مىڭ تەڭگە كولەمىندە پارا تالاپ ەتكەن.

جۇرگىزۋشىدە سول ساتتە اقشا بولماعاندىقتان، ول سومانى كەيىن اۋدارۋعا ۋادە بەرەدى. ناتيجەسىندە ينسپەكتور اكىمشىلىك حاتتاما تولتىرماي، بوساتىپ جىبەرگەن. الايدا ارادا بىرنەشە كۇن وتكەنىنە قاراماستان، جۇرگىزۋشى اقشانى اۋدارماعان ءارى قوڭىراۋلارعا جاۋاپ بەرمەي قويعان.

بولماعان سوڭ پوليتسەي جۇرگىزۋشى ءۇشىن اراشا تۇسكەن تانىسىنا حابارلاسادى. وعان 15 مىڭ تەڭگە بەرسە جەتكىلىكتى ەكەنىن ايتقان.

— ينسپەكتورمەن قارىم-قاتىناسىن بۇزعىسى كەلمەگەن تانىسى ءوز قاراجاتىنان 15 مىڭ تەڭگە كولەمىندە پارا بەرۋدى ۇيعارعان. قىلمىستىق نيەتىن جۇزەگە اسىرۋ ماقساتىندا ول وزگە ازاماتقا تەلەفون سوعىپ، 15 مىڭ تەڭگە قارىز سۇراعان، — دەلىنگەن پاۆلودار قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىندە.

اقىرىندا ينسپەكتور پارا العان. الايدا وقيعانىڭ ءمان-جايى قۇقىق قورعاۋ ورگاندارىنا بەلگىلى بولىپ، قىلمىستىق ءىس قوزعالعان.

سوت الدىندا بۇرىنعى پوليتسيا قىزمەتكەرى مەن جۇرگىزۋشىنى جاۋاپكەرشىلىكتەن بوساتۋدى سۇراعان ونىڭ تانىسى جاۋاپ بەردى.

سوت ەكەۋىن دە سىبايلاس جەمقورلىققا جول بەرگەندەرى ءۇشىن كىنالى دەپ تانىدى. بۇرىنعى پوليتسەيگە پارا العانى ءۇشىن 750 مىڭ تەڭگە ايىپپۇل سالىندى. ال ەكىنشى ايىپتالۋشى پارا بەرگەنى ءۇشىن كىنالى دەپ تانىلىپ، 225 مىڭ تەڭگە ايىپپۇل تولەۋگە مىندەتتەلدى.

جۇرگىزۋشى ءىس بويىنشا كۋاگەر رەتىندە وتكەن.