التايداعى اباق كەرەي اتقا مىنەرلەرىنىڭ «الاش ورداعا» جازعان تىلەكتەستىك حاتى
استانا. قازاقپارات - قازاق-قىرعىز جۇرتى بىرلەسىپ الاش وردا ۇكىمەتىن قۇرعان كەزدە وعان قولداۋشى بولىپ، تىلەۋلەستىك بىلدىرگەن شەتجۇرت قازاقتارىنىڭ ءبىرى- قىتاي قازاقتارى ەدى.
«الاش وردا ۇكىمەتى قۇرىلعان كەزدە التاي، شاۋەشەك جانە قۇلجادان ارت-ارتىنان تىلەۋلەستىك قۇتتىقتاۋ حاتتار مەن قازاق ءتول باسپاسىنا كومەك سومالار جولدانعان. بۇل حات سەمەيدەن شىعاتىن «سارى ارقا» گازەتىندە 1918-جىلى باسىلعان»، - دەپ جازادى تاريحشى ەلدەس وردا.
التايداعى اباق كەرەي اتقا مىنەرلەرىنىڭ «الاش ورداعا» جازعان حاتىنا «تىلەكتەستىك» دەپ تاقىرىپ قويىلعان. حات «قىتاي جۇرتىنا قاراعان الاش ۇراندى اباق كەرەيىنەن» دەپ باستالعان.
«حابارلاردان ەستۋىمىز بويىنشا روسسياعا قاراعان قازاق-قىرعىز بىرىگىپ، ءوز الدىنا جۇرت بولىپ، الاش ورداسىن تىگىپ، الاش تۋىن كوتەردى دەگەندى ەستىپ، پاتشامىز باسقا بولسادا، ۇرانىمىز الاش، ءناسىلىمىز قازاق بولعاندىقتان الاش بالاسىنىڭ باسى قوسىلىپ، جۇرت قاتارىندا كەلۋىنە تىلەكتەستىگىمىزدى بىلدىرەمىز. ويلاعاندارى ورىننان شىعىپ، ىسكە ءسات بەرسىن» - دەپ تىلەك ايتىپتى.
«ۇلت قازىناسىنا جاردەم بەرۋشى قىتاي قازاقتارى»، دەپ حات سوڭىنا التايداعى يگى-جاقسىلاردىڭ اتى-ءجونىن ءتىزىپ بەرەدى.
ۇلت قازىناسىنا، جاردەم بەرۋشى قىتاي قازاقتارى:
1. بەيسى گۇڭ ءمامي جۇرتبايەۆ
2. ءامىر تۇركىستان عۇسمانوۆ
3. امبى اقباي جاكە بالاسى
4. ۇكىرداي حانافيا ءمامي بالاسى
5. بايموللا قارەكەيەۆ
6. كاكەن تۇركستان بالاسى
7. زيا ءمامي بالاسى
8. ماڭكەي ءمامي بالاسى
9. مۇعالىم سەيىتقازى نۇرتايەۆ
10. ءسالي احۇن سەيتجەلوۆ
11. ۇكىرداي قۇيقاباي ميراكە بالاسى
12. ۇكىرداي بۇلان ءۋالي بالاسى
13. ءشارىپحان جەڭىسحان بالاسى
14. زاڭگى ماجعالا ساتىلعان بالاسى
15. زاڭگى ۇمبەتباي بالاسى
16. توقتار قىرىقباي بالاسى
17. زاڭگى قوڭقىش بولەكينوۆ
18. كامىل داركەن
19. مۇعالىم اۋكەنوۆ
20. كەنەباي ىسحاقوۆ
21 . ابۋقايىم بەرىكبايەۆ
22. ابىلقان بايقونىسوۆ.
بۇدان سىرت قىتايداعى شاۋەشەك، قۇلجا جانە كۇنەس قازاقتارىنىڭ دا الاشقا جولداعان حات نۇسقالارى بار.
erjanibek.kz
