التاي ايماعىندا ەڭكەيگەن قاريادان، التى جاستاعى بالاعا دەيىن شاڭعى تەبەدى
قارت التايدىڭ قارلى شىڭى، تابيعاتى مەن ساف تازا اۋاسى كەز كەلگەن تۋريستى وزىنە باۋراپ الادى. ايماقتا شاڭعى سپورتى وتە جاقسى دامىعان. مۇندا تەك سپورتشىلار عانا ەمەس، اۋەسقوي شاڭعى تەبۋشىلەر دە ءجيى كەلەدى.
بۇل تۋرالى ورتالىق ازيا ب ا ق وكىلدەرىنە ارنالعان باسپا ءسوز تۋرى بارىسىندا جەرگىلىكتى شاڭعى كۋرورت وكىلدەرى ايتتى، دەپ حابارلايدى Kazinform.
«مىنا شاڭعى كۋرورتىندا كەلۋشىلەرگە بارلىق جاعداي جاسالعان. ۇزىندىعى 65 شاقىرىم بولاتىن 61 سىرعاناۋ جولى بار. التايعا شاڭعى تەبۋگە ارنايى كەلەتىن تۋريستتەر كوپ. بىلتىر 18 مەملەكەتتەن كەلدى. ونىڭ ىشىندە قازاقستان دا بار. شاڭعى ماۋسىمى ەندى اشىلىپ جاتىر، ونىڭ ۇستىنە قازاقستان مەن قىتاي مەملەكەتتەرى اراسىندا ۆيزاسىز رەجيىم ەنگىزىلدى. بيىل قازاقستاننان قىستىڭ وسى سپورت تۇرىمەن شۇعىلداناتىن تۋريستەر كوپتەپ كەلەدى دەپ بولجانۋدا»، - دەدى تاۋ شاڭعى كۋرورتىنىڭ وكىلى شى جي گو.
الپىس جاستاعى سەرىكبەك كەنجەحان ۇلى شاڭعىنى التى جاسىنان باستاپ تەبەدى. كىشكەنتاي كەزىندە جوتادان سىرعاناپ ۇيرەنگەن ول بۇگىندە شاڭعىمەن كۇنىنە 15-20 شاقىرىم جەردى ءجۇرىپ وتەدى.
«التاي ايماعىندا شاڭعى تەپپەيتىن ادام جوق. ەڭبەكتەگەن بالادان، ەڭكەيگەن قارياعا دەيىن شاڭعى تەبۋدى جاقسى مەڭگەرگەن. التايلىق بالالاردىڭ ويىنى وسى - شاڭعى. ايماقتىڭ اتى ايتىپ تۇرعانداي، بىزدە التى اي قىس بولادى. العاشقى قار قازاننىڭ سوڭىندا ءتۇسىپ، مامىرعا قاراي ەريدى»، - دەيدى ول.
ايتۋىنشا، شاڭعى - ادام دەنساۋلىعىنا ەڭ پايدالى سپورت ءتۇرىنىڭ ءبىرى.
«دەنساۋلىققا وتە پايدالى. وسى سپورتپەن شۇعىلدانعان ادام اۋىرمايدى. ونى نىق سەنىممەن ايتا الامىن. مىسالى، مەنى دارىگەرگە قازىر اپارساڭىز دا بولادى. ەشقانداي دەرت تاپپايدى»، - دەيدى ول.
التاي ايماعىندا ءتورت تاۋ شاڭعى كۋرورتى بار. سونىڭ ءبىرى - التاي قالاسىنىڭ ماڭىندا ورنالاسقان حالىقارالىق گەنارال تاۋى شاڭعى كۋرورتى. بۇل جەرگە 2022-2023 -جىلعى ماۋسىمدا 439700 تۋريست كەلگەن. ونىڭ 244500- ءى شاڭعىشى.
اۆتور
الما مۇقانوۆا
