الەۋمەتتىك ءاميان: بالالار مەكتەپتە جەڭىلدىكپەن تاماقتانىپ، تەگىن ءدارى- دارمەك الادى
استانا. KAZINFORM - بيىلعى 1-قىركۇيەكتەن باستاپ ەلىمىزدىڭ بارلىق وڭىرىندە «الەۋمەتتىك ءاميان» شەڭبەرىندە وقۋشىلاردى تەگىن جانە جەڭىلدىكپەن تاماقتاندىرۋ بويىنشا جوبانى كەڭىنەن تاراتۋ باستالادى.
جوبا قازاقستاندىقتارعا كورسەتىلەتىن مەملەكەتتىك قولداۋ شارالارىنىڭ قولجەتىمدىلىگى مەن اشىقتىعىن قامتاماسىز ەتۋگە باعىتتالعان.
پيلوتتىق رەجيمدە 2023 -جىلدىڭ سوڭىنان بەرى ەلىمىزدە ازاماتتاردىڭ جەكەلەگەن ساناتتارىن ءدارى-دارمەكپەن قامتاماسىز ەتۋ، مەكتەپتەردە تەگىن جانە جەڭىلدىكپەن تاماقتاندىرۋ سياقتى قىزمەتتەر ىسكە اسىرىلۋدا.
ءدارى-دارمەكپەن قامتاماسىز ەتۋ بويىنشا 43 ۇيىم قوسىلدى، 30 مىڭ رەتسەپت ىسكە اسىرىلدى؛ مەكتەپتە تەگىن جانە جەڭىلدىكپەن تاماقتاندىرۋعا - 93 ۇيىمعا 27 مىڭ تۇسكى اس تاراتىلدى.
«الەۋمەتتىك امياندى» ازىرلەۋشىلەر اتالعان پيلوتتىق جوبانىڭ ءساتتى تاجىريبەسىن تاراتۋعا نيەتتى.
«الەۋمەتتىك ءاميان» ازاماتتاردىڭ EGOV قوسىمشاسىندا مەملەكەت تاراپىنان كورسەتىلەتىن بارلىق قولداۋ قۇرالدارى مەن شارالارىن جيناقتاۋ ارقىلى ازاماتتارعا مەملەكەتتىك قولداۋ شارالارىن الۋدى جەڭىلدەتۋ ءۇشىن جاسالعان. اتالعان جوبا ارقىلى مەملەكەتتىك كومەك الۋ جانە ونىڭ جۇرگىزىلۋ تاريحىن قاداعالاۋ ىڭعايلى. ۆاۋچەرلەر جەكەلەندىرىلگەن تۇردە جازىلادى، بۇل كەز كەلگەن زاڭسىز تىركەۋلەردىڭ مۇمكىندىگىن شەكتەيدى. جىل سوڭىنا دەيىن اتالعان ءونىم ەلىمىزدىڭ بارلىق ازاماتتارىنا ىستىق تاماق پەن ءدارى-دارمەك بويىنشا قولجەتىمدى بولادى دەپ جوسپارلانىپ وتىر»، - دەدى BTS Digital ج ش س باس ديرەكتورى نۇرتاي ابىلعاليەۆ.
بۇدان باسقا، «الەۋمەتتىك ءاميان» شەڭبەرىندە اقشالاي قاراجاتتى مونەتيزاتسيالاۋ، مۇگەدەكتىگى بار ادامدار ءۇشىن تەحنيكالىق وڭالتۋ قۇرالدارىن ساتىپ الۋ؛ حالىقتىڭ الەۋمەتتىك وسال توپتارىنا ءامات تىزبەسىنەن ازىق-تۇلىك ساتىپ الۋدا اتاۋلى كومەك كورسەتۋ؛ الەۋمەتتىك وسال ساناتتاعى تۇتىنۋشىلار ءۇشىن تاۋارلى گازعا ۆاۋچەرلەر مەن ج ج م باعاسىنىڭ ءوسۋىن وتەۋ ءۇشىن ۆاۋچەرلەر ۇسىنۋ بويىنشا پيلوتتىق جوبانى ىسكە قوسۋ قوسىمشا پىسىقتالىپ جاتىر.
