الەۋمەتتىك ءاميان: 2025 -جىلدان قازاقستاندىقتاردى نە كۇتىپ تۇر
استانا. KAZINFORM - الەۋمەتتىك ءاميان - قازاقستان ازاماتتارىنا كورسەتىلەتىن مەملەكەتتىك قولداۋ شارالارىنىڭ قولجەتىمدىلىگى مەن اشىقتىعىن قامتاماسىز ەتۋگە باعىتتالعان جوبا.
مەملەكەت باسشىسى قاسىم-جومارت توقايەۆ بيىلعى «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا ۇكىمەتكە 2025 -جىلدان باستاپ «الەۋمەتتىك ءاميان» جوباسىن تولىق ەنگىزۋدى تاپسىردى. وسى ورايدا اتالعان مىندەتتى ورىنداۋداعى دايىندىق بارىسىنا شولۋ جاساعان ەدىك.
«الەۋمەتتىك ءاميان» جوباسى - 2020 -جىلى قولعا الىندى، اتاپ ايتقاندا، كوروناۆيرۋس ىندەتى ەتەك جايعان كەزدە، جۇمىسسىز قالعان ازاماتتارعا الەۋمەتتىك قولداۋ رەتىندە 42500 تەڭگەدەن بەرىلە باستادى. دەگەنمەن كوپ ازامات ەسەپشوتتى اشۋ جاعىنان قيىندىققا تاپ بولدى.
2020 -جىلى مەملەكەت باسشىسى قازاقستان حالقىنا جولداۋىندا الەۋمەتتىك تولەمدەر جۇيەسىن سيفرلاندىرۋ قاجەتتىگىن ايتا كەلە، الەۋمەتتىك ءاميان ەنگىزۋ باستاماسىن كوتەردى.
جوبا وتكەن جىلدان بەرى ازاماتتاردىڭ جەكەلەگەن ساناتتارىن ءدارى- دارمەكپەن قامتاماسىز ەتۋ، مەكتەپ وقۋشىلارىن تەگىن جانە جەڭىلدىكپەن تاماقتاندىرۋ قىزمەتتەر ۇسىنىپ، پيلوتتىق رەجيمدە ىسكە اسىرىلىپ كەلەدى. «الەۋمەتتىك ءاميان» قىزمەتىن پايدالانۋ ءۇشىن App Store جانە Play Market دۇكەندەرىندە قولجەتىمدى eGov Мobile قوسىمشاسىن جۇكتەپ الۋ قاجەت.
پرەزيدەنت تاپسىرماسى بويىنشا ۇكىمەت 2025 -جىلدان باستاپ «الەۋمەتتىك ءاميان» جوباسىن تولىقتاي ەنگىزۋ جۇمىستارىنا كىرىسىپ كەتتى.
«سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگى، دەنساۋلىق ساقتاۋ مينيسترلىگى جانە وقۋ-اعارتۋ مينيسترلىگى ءوڭىر اكىمدىكتەرىمەن بىرلەسىپ، 2025 -جىلعى 1 -قاڭتاردان باستاپ الەۋمەتتىك ءامياننىڭ ەنگىزىلۋىن قامتاماسىز ەتسىن. تيىسىنشە، 1 -جەلتوقسانعا دەيىن الەۋمەتتىك ءاميانعا كىرەتىن مەملەكەتتىك قىزمەتتەر ءتىزىلىمىن بەكىتۋ كەرەك»، - دەدى پرەمەر-مينيستر ولجاس بەكتەنوۆ ۇكىمەت وتىرىسىندا.
جوبادا ءار وتباسىعا الەۋمەتتىك مارتەبەسىنە قاراي ۇسىنىلاتىن بارلىق مەملەكەتتىك قولداۋ تۇرلەرى بولادى. سونداي- اق، قولداۋدىڭ ناقتى بەرىلۋ فاكتىسى نەگىزىندە مەملەكەت تاراپىنان كورسەتىلگەن كومەك سوماسى دا كورسەتىلەدى.
وقۋشىلاردى تەگىن جانە جەڭىلدىكپەن بەرىلەتىن تاماقپەن قامتۋ
وقۋ- اعارتۋ مينيسترلىگى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسە وتىرىپ، eGov Mobile موبيلدى قوسىمشاسىندا «الەۋمەتتىك ءاميان» ارقىلى مەكتەپتەردە تەگىن تاماقتاندىرۋ بويىنشا پيلوتتىق جوبانى ىسكە قوستى.
جوبا اتا- انالارعا قىزمەتتى پرواكتيۆتى تۇردە الۋعا، بالالارىنىڭ مەكتەپ اسحانالارىنا بارۋىن باقىلاۋعا جانە جەڭىلدىكپەن تاماقتانۋ ءۇشىن سيفرلىق ۆاۋچەرلەردى پايدالانۋعا مۇمكىندىك بەرەدى.
بالانىڭ مەكتەپتە تاماقتانعانى جۇيەدە ەسەپكە الىنادى جانە بۇل تۋرالى اتا- اناسى دا eGov Mobile موبيلدى قوسىمشاسىندا «الەۋمەتتىك ءاميان» ارقىلى اقپارات الادى. سونداي- اق، اتا- انا مەملەكەتتىك قولداۋ شاراسىنىڭ ساپاسى تۋرالى كەرى بايلانىس قالدىرا الادى. سونىڭ نەگىزىندە قىزمەت كورسەتۋ اكتىسى مەن تولەم شوتى جاسالادى.
مەملەكەتتىك قارجىلاندىرۋ تاماقتانۋ فاكتىسى بويىنشا جۇزەگە اسىرىلادى جانە بۇرىنعىداي باستاۋىش سىنىپ وقۋشىلارىنىڭ سانىنا نەگىزدەلمەيدى. وسىلايشا، الەۋمەتتىك ءاميان مەملەكەتتىك قولداۋ شارالارىنىڭ اتاۋى مەن ۆاليداتسياسىن اشىق كورسەتەدى.
قازىرگى ۋاقىتتا تاماقتاندىرۋدى ەسەپكە الۋ جانە تىركەۋ جۇيەلەرى 15 وڭىردەگى 250 مەكتەپتە جۇمىس ىستەيدى. جوبانى كەڭەيتۋ ءۇشىن مەكتەپتەردى تاماقتاندىرۋدى ەسەپكە الۋ مەن تىركەۋ جۇيەلەرىمەن قامتاماسىز ەتۋ جانە ولاردى «الەۋمەتتىك ءاميان» جۇيەسىمەن ينتەگراتسيالاۋ جۇمىستارى جۇرگىزىلۋدە.
ايتا كەتسەك، پيلوتتىق جوبا اقمولا، ماڭعىستاۋ وبلىستارىندا جانە استانا مەن شىمكەنت قالاسىندا سىناقتان ءساتتى ءوتتى. ودان ءارى مەكتەپتەردىڭ دايىندىعىنا قاراي بىرتىندەپ ەنگىزىلمەك.
«الەۋمەتتىك ءاميان» ارقىلى تەگىن ءدارى- دارمەكتى قالاي الۋعا بولادى؟
ول ءۇشىن eGov Mobile قوسىمشاسىندا تىركەۋدەن ءوتۋى كەرەك، ال بۇرىن تىركەلگەن بولسا سايكەستەندىرۋى ءتيىس. ءارى قاراي، پاتسيەنت باستى بەتتە «الەۋمەتتىك ءاميان» بولىمىنە كىرىپ، «ءدارى- دارمەكپەن قامتاماسىز ەتۋ» جولىن تاڭدايدى.
ەگدە جاستاعى نەمەسە سەرۆيس قىزمەتتەرىن پايدالانا المايتىن ازاماتتار ءۇشىن ەمحاناعا بارعان كەزدە Face-ID جانە ۆەب- كامەرالاردىڭ كومەگىمەن سايكەستەندىرۋدەن ءوتۋ جەتكىلىكتى، سودان كەيىن پاتسيەنتتىڭ قولىنا ءتيىستى ءدارى- دارمەك بەرىلەدى.
دەنساۋلىق ساقتاۋ مينيسترلىگىنىڭ مالىمەتىنشە، «الەۋمەتتىك ءاميان» ارقىلى ءدارى- دارمەكتەردى ەلەكتروندىق تۇردە بەرۋ جونىندەگى پيلوتتىق جوباعا ەل بويىنشا 700-دەن استام مەديتسينالىق ۇيىم قاتىسادى، 93 مىڭ رەتسەپت نەگىزىندە پرەپاراتتار بەرىلگەن. وسىلايشا، ەندى ناۋقاستار قاعاز رەتسەپت الۋ ءۇشىن دارىگەرگە جازىلۋعا ۋاقىت جۇمساۋدىڭ قاجەتى جوق، مەيىرگەر كەزەكسىز قاجەتتى پرەپاراتتى ءوز بەتىنشە بەرەدى.
سونداي- اق، ۆەدومستۆو سىرقات جانداردى ءدارى- دارمەكپەن قامتاماسىز ەتۋدە زاڭسىز اينالىم، بۇرمالاۋ جانە باسقا دا زاڭ بۇزۋشىلىقتارعا جول بەرمەۋ ماقساتىندا «الەۋمەتتىك ءامياندى» پايدالانۋ قولجەتىمدىلىك پەن تولىق اشىقتىقتى قامتاماسىز ەتەتىنىن ايتىپ وتىر.
«الەۋمەتتىك ءاميان»: ءار ازاماتقا قانداي مەملەكەتتىك قولداۋ تۇرلەرى تيەسىلى ەكەنى تۋرالى حابارلاما جىبەرىلەدى
سونىمەن 2025 -جىلدان باستاپ ەلىمىزدە «الەۋمەتتىك ءاميان» جوباسى تولىق ەنگىزىلەدى. قازىر اتالعان جوبانى سيفرلاندىرۋ پروتسەسى قالاي ءجۇرىپ جاتىر؟ وسىعان جاۋاپ ىزدەپ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە رەسمي ساۋال جولداعان ەدىك.
«مەملەكەتتىك قىزمەتتەردى سيفرلاندىرۋ بىزگە مەملەكەتتىك قولداۋ شارالارىن الۋعا ءتيىستى ازاماتتاردى عانا ەمەس، ولاردىڭ كولەمىن دە انىقتاۋعا مۇمكىندىك بەرەدى. كوپتەگەن ازاماتتار قانداي مەملەكەتتىك قولداۋ شارالارى تيەسىلى ەكەنىن بىلمەيدى. «الەۋمەتتىك ءاميان» - مەملەكەتتىك قولداۋ شارالارىنىڭ بارلىق ءتۇرى تۋرالى حابارلاۋدىڭ، ۇسىنۋدىڭ جانە ەسەپكە الۋدىڭ ءبىرىڭعاي پلاتفورماسى. بۇل پلاتفورماعا كەزەڭ- كەزەڭىمەن مەملەكەتتىك قولداۋ شارالارى كوشىرىلەدى جانە ءاربىر ازاماتقا قانداي مەملەكەتتىك قولداۋ تۇرلەرى تيەسىلى ەكەنى تۋرالى حابارلاما جىبەرىلەدى»، - دەلىنگەن ۆەدومستۆو جاۋابىندا.
اقپاراتتا ايتىلعانداي، بۇل جوبا تسيفرلىق تەحنولوگيالاردى ەنگىزۋ ەسەبىنەن الەۋمەتتىك كومەك قۇرالدارىن ماقساتسىز پايدالانۋعا جول بەرمەۋگە، ياعني تولەمدەردىڭ ماقساتتى جۇمسالۋىن قامتاماسىز ەتۋگە باعىتتالعان.
«وسىلايشا، ازامات مەملەكەتتىك قولداۋدىڭ بارلىق ءتۇرىن عانا ەمەس، سونىمەن قاتار مەملەكەت شىعىندارىنىڭ مولشەرىن دە كورەدى»، - دەيدى مينيسترلىكتەن.
الەۋمەتتىك ءاميانعا تۇسكەن تولەمدەردى قولما قول اقشالاي شەشىپ الۋعا نەمەسە بانكتەگى جەكە شوتىنا اۋدارۋعا بولمايدى
«باستاپقىدا «الەۋمەتتىك ءاميان» جوباسى ارقىلى اقشالاي ەمەس، ناقتى شارالار تۇرىندە كورسەتىلەتىن مەملەكەتتىك قولداۋ شارالارى كورسەتىلەدى. مىسالى، ىستىق تاماق، ءدارى- دارمەك نەمەسە مۇگەدەكتىگى بار ادامدارعا تەحنيكالىق قۇرالدار جانە تاعى سول سياقتى قىزمەت تۇرلەرى. ال مەملەكەتتىك قولداۋ شارالارى اياسىندا كورسەتىلگەن قىزمەتتەرگە جۇمسالعان سوما قورىتىندى ەسەپتە كورسەتىلەدى»، - دەپ ءتۇسىندىردى سيفرلىق مينيسترلىكتەن.
«الەۋمەتتىك ءاميان» جوباسىنا سيفرلىق تەڭگە ەنگىزىلمەك
«قازىرگى تاڭدا ۇلتتىق بانك قارجى مينيسترلىگىمەن بىرلەسە تسيفرلىق تەڭگە پلاتفورماسىن جۇزەگە اسىرۋدا. وسى ورايدا قازىناشىلىق كوميتەتىنىڭ قاتىسۋىمەن «الەۋمەتتىك ءاميان» جوباسى شەڭبەرىندە ۆاۋچەرلەرمەن سيفرلىق تەڭگەمەن ەسەپ ايىرىسۋ مۇمكىندىگى بەرىلەدى. بۇل باستاما الەۋمەتتىك تولەمدەردى اۆتوماتتاندىرۋ، اكىمشىلەندىرۋ جانە ەسەپكە الۋ پروتسەستەرىن جەدەلدەتۋگە، الەۋمەتتىك كومەكتىڭ ايقىندىعىن، سونىمەن قاتار ءۇشىنشى تۇلعالار تاراپىنان ءوندىرىپ الۋ مەن تىيىم سالۋدان ساقتالۋىنا كەپىلدىك بەرەدى»، - دەلىنگەن ساۋال جاۋابىندا.
ايتا كەتسەك، ۆەدومستۆونىڭ بىزگە ۇسىنعان دەرەگىنە سايكەس، «الەۋمەتتىك ءاميان» جوباسى اياسىندا مەملەكەتتىك قولداۋ شارالارى كەزەڭ- كەزەڭمەن جانە نورماتيۆتى- قۇقىقتىق اكتىلەردى سايكەستەندىرۋمەن قاتار جۇرگىزىلەدى. وسىلايشا ونىڭ فۋنكتسيونالدىعىن كەڭەيتۋ جوسپارلانىپ وتىر.
اۆتور
داۋلەت ىزتىلەۋ
