الەمنىڭ ءۇشىنشى ەكونوميكاسىنىڭ دامۋى باياۋلادى
استانا. قازاقپارات - «بۋندەس بانك» گەرمانيا ەكونوميكاسىنىڭ دامۋى الداعى ەكى جىلدا باياۋلايدى دەپ مالىمدەدى. وعان قازىرگى ستاتيستيكالىق كورسەتكىشتەردىڭ جازداعى بولجامنان الدەقايدا تومەن بولىپ شىعۋى سەبەپ.
فەدەرالدى بانك پرەزيدەنتى يواحيم ناگەل ءوز ەسەبىندە قۇرىلىمدىق قيىندىقتار قوردالانىپ بارا جاتقانىن ايتىپ، رەفورمالار جاساۋعا شاقىردى.
الەمنىڭ ءۇشىنشى ەكونوميكاسىنىڭ باسەڭدەۋىنە نە سەبەپ؟
بۇل - كولىك يندۋسترياسىنىڭ الپاۋىتى فولكسۆاگەن جۇمىسشىلارىنىڭ وسى ايداعى ەرەۋىلى. جۇرت قارجىلىق قيىندىقتارعا تاپ بولعان كومپانيانىڭ مىڭداعان جۇمىس ورنىن قىسقارتىپ، زاۋىتتاردى جابۋىنا نارازى. وسى سەكىلدى داعدارىس گەرمانيانىڭ وزگە دە جەتەكشى سالالارىندا بولىپ جاتىر.
بۋندەسبانك مالىمەتىنشە، بيىلعى ماۋسىمداعى ەسەپ 2024 -جىلعى ەكونوميكالىق ءوسىمدى %0,3 دەپ بولجاسا، جىل اياعىندا بۇل كورسەتكىش %0,2- كە تۇسكەن. 2025 -جىلى %1.1 كە داميدى دەگەن كورسەتكىش قازىر تىپتەن از بولسا، 2026 -جىلعى دامۋ %1- كە دە جەتپەۋى مۇمكىن. ەكونوميكانىڭ باسەڭدەۋى مەن بولجامداردىڭ ناشارلاۋىنا كەلەسى فاكتورلار سەبەپ بولىپ وتىر.
ۋرس ۋنكاۋف، گەرمانيانىڭ ەكونوميكالىق دامۋى جانە حالىقارالىق ساۋدا فەدەرالدى قاۋىمداستىعىنىڭ اتقارۋشى ديرەكتورى:
- گەرمانيادا ەنەرگيا كوزى تىم قىمبات. ەكونوميكاسى كولىك جانە كۇردەلى تەحنولوگيالار يندۋسترياسىنا نەگىزدەلگەن ەل رەتىندە بۇل ماسەلە ەداۋىر سالماق سالىپ جاتىر. ودان سوڭ قاعازباستىلىق كوپ. ول شيكىزاتتى وڭدەۋدەن باستاپ نارىققا جەتكىزۋگە دەيىنگى ۋاقىتتى ۇزارتىپ، كومپانيالارعا شىعىن كەلتىرىپ وتىر. مامان تاپشىلىعى دا ارتىپ بارادى. مۇنىڭ ءبارى ەلدەگى كاسىپكەرلىك الەۋەتتى السىرەتەدى.
بۇل ولقىلىقتاردى جويۋ كەرەك. سەبەبى قازىرگى گەرمانيانىڭ ەكونوميكالىق جەتىستىكتەرى 2000 -جىلدارداعى ۇكىمەتتىڭ ءساتتى رەفورمالارىنىڭ جەمىسى. ءبىراق زامان وزگەرگەن سايىن ول رەفورمالار دا ەسكىرەدى. اڭگىمە انگەلا مەركەلگە دەيىنگى كانسلەر گەرحارد شرودەردىڭ «اگەندا 2010» ساياساتى جايىندا.
ساراپشىلاردىڭ سوزىنشە اتالعان رەفورمالار ەل ەكونوميكاسىنا وڭ اسەرىن تيگىزگەن. قازىر حالىق وسىعان ۇقساس تىڭ سەرپىلىستىڭ بولعانىن قالايدى. الداعى پارلامەنت سايلاۋىنداعى باستى ماسەلە دە وسى بولعالى تۇر. دەر كەزىندە ءتيىمدى شەشىم تابىلماسا كەرى اسەردىڭ تاعى ءبىر تولقىنى دونالد ترامپتىڭ اكىمشىلىگىمەن كەلۋى مۇمكىن. 2025 -جىلى بيلىككە ورالاتىن ساياساتكەر. ەۋرووداق پەن گەرمانياعا تاريف سالۋدى كوزدەپ وتىر. بۇعان قامدانعان كارى قۇرلىقتاعىلار ساۋدانىڭ بالامالى جولدارىن ىزدەپ الەك. ءتىپتى تالاي جىلدان بەرى قابىلدانباي تۇرعان مەركوسۋر كەلىسىمى لاتىن امەريكاسىنا تىڭ جول اشىپ بەردى.
«ءدال وسىنداي ءتيىمدى باعىت قازاقستانمەن دە بايلانىستى ارتتىرۋى بەك مۇمكىن»، - دەيدى ساراپشى.
ۋرس ۋنكاۋف، گەرمانيانىڭ ەكونوميكالىق دامۋى جانە حالىقارالىق ساۋدا فەدەرالدى قاۋىمداستىعىنىڭ اتقارۋشى ديرەكتورى:
- سوڭعى ۋاقىتتا نەمىس كاسىپكەرلەرى «ترانسكاسپي دالىزىنە» زور قىزىعۋشىلىق تانىتىپ، قازاقستانمەن قاتىناستى ارتتىرۋعا كۇش سالىپ جاتىر. ەكونوميكالىق قيىندىقتار ءورشىپ بارا جاتقان ساتتە بالامالى باعىتتاردى ىزدەۋ گەرمانيا ءۇشىن زامان تالابىنا اينالدى. سوندىقتان قازىر مەملەكەت دەڭگەيىندەگى بايلانىستاردان بولەك، فەدەرالدى وڭىرلەر مەن قالالاردىڭ قازاقستانمەن سەرىكتەستىك ورناتۋى بەلسەندى ءجۇرىپ جاتىر.
دەموگرافيالىق ماسەلەلەر، بىلىكتى ماماندار تاپشىلىعى مەن ميگراتسيا دا الەمنىڭ ءۇشىنشى ەكونوميكاسىنا كەرى اسەر ەتىپ، تومەندەتۋى مۇمكىن. ءارى گەرمانيا كوزىرىنە اينالعان كولىكتەر مەن حيميالىق ونىمدەردى وزگە ەلدەر دە ارزان باعادا شىعارىپ وتىرعان زاماندا تىڭ ۇسىنىستار مەن سەنىمدى سەرىكتەستەر المانيا ءۇشىن اسا قاجەت بولىپ وتىر.
24.kz
