الەمدەگى العاشقى بالا قاتەرلى ىسىكتىڭ ايىقپاس ءتۇرىن جەڭدى
بەلگيالىق 12 جاستاعى لۋكاس قاتەرلى ىسىكتىڭ جازىلمايتىن ءتۇرىن جەڭگەن الەمدەگى العاشقى بالا، ول قازىر رەميسسيا كەزەڭىندە، دەپ حابارلايدى قازاقپارات بۇل تۋرالى Le Figaro ارناسىنا سىلتەمە جاساپ.

بۇل بالالىق شاقتاعى قاتەرلى ىسىكتىڭ وتە اگرەسسيۆتى ءتۇرىن - مي باعانىنىڭ ينفيلتراتسيالىق گليوماسىن جەڭە العان الەمدەگى ءبىرىنشى جاعداي.
لۋكاس ۆال- دە- مارنداعى گيۋستاۆ رۋسسي ينستيتۋتىندا باقىلانىپ، BIOMEDE دەپ اتالاتىن كلينيكالىق سىناققا الىندى. بۇل جاعدايدا ناۋقاستاردى ەمدەۋ دياگنوز كەزىندە الىنعان بيوپسيا نەگىزىندە جۇزەگە اسىرىلاتىن ىسىكتەردىڭ د ن ق سەكۆەنسياسىنا سايكەس تاعايىندالادى.
لۋكاستىڭ اعزاسى اۋرۋمەن بىرتە- بىرتە كۇرەستى. بەس جىلدىق باقىلاۋدان كەيىن دارىگەرلەر ەمدەۋدى توقتاتۋ تۋرالى شەشىم قابىلدادى. ناتيجەسىندە بالا ءبىر جىلدان بەرى ەم قابىلداماي- اق ءومىر ءسۇرىپ جاتىر جانە ءوزىن جاقسى سەزىنەدى.
گيۋستاۆ رۋسسي ينستيتۋتىنىڭ مالىمەتى بويىنشا، جىل سايىن 50-گە جۋىق بالا مي باعانىنىڭ ينفيلتراتسيالىق گليوماسىنان زارداپ شەگەدى. بۇل مي ىسىگى وتە اگرەسسيۆتى جانە ونىمەن اۋىراتىن ناۋقاستاردىڭ بولاشاعى وتە ناشار بولجانادى.
اۆتور
ەركەجان سماعۇلوۆا