الەمدە ءتىس ەمدەۋ قۇنى قانشا تۇرادى؟

استانا. قازاقپارات - الەم بويىنشا ءتىس ەمدەۋ ەڭ قىمبات قىزمەتتەردىڭ ءبىرى سانالادى. ساراپشىلاردىڭ مالىمەتى بويىنشا ستوماتولوگيالىق كومەك كورسەتۋدە كوش باستاپ تۇرعان ەل - ا ق ش. مۇندا ەمنىڭ ورتاشا قۇنى 500 دوللاردان اسادى.

 ەكىنشى جانە ءۇشىنشى ورىنداردا كانادا مەن ۇلى بريتانيا تۇر. بۇل ەلدەردىڭ تۇرعىندارى ورتا ەسەپپەن ءتىس ەمدەتۋگە 400 دوللار جۇمسايدى. ستوماتولوگيالىق قىزمەتكە كەتەتىن شىعىندى ازايتۋ ءۇشىن باتىس ەلدەرىنىڭ تۇرعىندارى مەكسيكا، تۇركيا جانە تايلاندقا ءجيى بارادى. اتالعان ەلدەردە ساپالى ستوماتولوگيالىق قىزمەتتەر قولجەتىمدى باعادا ۇسىنىلادى.

مەديتسينالىق تۋريزمدى تاڭداعان كوپ ناۋقاس دەمالىس ۋاقىتىن ەمدەلۋمەن ۇيلەستىرىپ، ساپارلارىن ءتيىمدى وتكىزەدى. ا ق ش پەن كانادا ازاماتتارى نەگىزىنەن مەكسيكانى تاڭدايدى. سوڭعى جىلدارى ستوماتولوگيالىق تۋريزمنىڭ نەگىزگى ورتالىقتارى رەتىندە تيحۋانا، كانكۋن جانە مەحيكو قالالارى تانىلدى. مىسالى، مەكسيكادا ءبىر ءتىس يمپلانتىن ورناتۋ قۇنى شامامەن 1000 دوللار. ال ا ق ش- تا بۇل سوما 6000 دوللارعا دەيىن جەتۋى مۇمكىن.

تۇركيا دا ستوماتولوگيالىق تۋريزم ءۇشىن تانىمال باعىتقا اينالدى. ونداعى كلينيكالار زاماناۋي تەحنولوگيالاردى قولدانا وتىرىپ، كەڭ اۋقىمدى ستوماتولوگيالىق قىزمەتتەر ۇسىنادى. ەلدە ءبىر ءتىس يمپلانتاتسياسىنىڭ قۇنى شامامەن 700 دوللار. ا ق ش ستوماتولوگيالىق قىزمەتتەر ەڭ قىمبات مەملەكەتتەردىڭ ءبىرى. ەلدە قاراپايىم ءتىس ەمدەۋ پروتسەدۋرالارىنىڭ ورتاشا قۇنى 500 دوللاردان باستالادى. كەيدە 1000 دوللارعا دەيىن جەتەدى. مەديتسينالىق ساقتاندىرۋى جوق ناۋقاستار ءۇشىن بۇل سوما بىرنەشە ەسە ارتۋى مۇمكىن.

 قىزمەت باعاسىنىڭ وسۋىنە بىرنەشە فاكتور اسەر ەتەدى. وعان اسىرەسە، زاماناۋي تەحنولوگيالار مەن جوعارى ساپالى ماتەريالداردى قولدانۋ كىرەدى. سونىمەن قاتار تاجىريبەلى مامانداردىڭ قىزمەتى قاراپايىم كلينيكالارداعىدان الدەقايدا قىمباتىراق بولادى. ەڭ كوپ قارجىنى قاجەت ەتەتىن پروتسەدۋرالار قاتارىنا يمپلانتاتسيا، پروتەزدەۋ جانە ءتىس اعارتۋ قىزمەتتەرى جاتادى.

كانادادا ستوماتولوگيالىق قىزمەتتەردىڭ ورتاشا قۇنى شامامەن 400 دوللاردان باستالادى. بۇل ەلدە ءتىس ەمدەۋ نەگىزىنەن جەكە كلينيكالاردا جۇرگىزىلەدى. كەيبىر الەۋمەتتىك توپتارعا ارنالعان بىرنەشە مەملەكەتتىك باعدارلامالار قاراستىرىلعان. ولار ستوماتولوگيالىق قىزمەتكە كەتكەن شىعىنداردى ازايتۋعا باعىتتالعان. ناقتى ايتقاندا، جىلدىق تابىسى 90 مىڭ دوللارعا دەيىنگى وتباسىلار وسى جەڭىلدىكتەردى پايدالانا الادى. سونىمەن قاتار، ستوماتولوگيالىق وقۋ مەكەمەلەرى مەن قوعامدىق مەديتسينالىق ورىنداردا قىزمەت باعاسى ايتارلىقتاي تومەن.

 24.kz