الەمدە 2 ميلليارد 100 ميلليون ادام جالعىز تۇرادى
استانا. قازاقپارات - كەيىنگى جۇرگىزىلگەن زەرتتەۋ وسىنى كورسەتكەن. بويداقتاردىڭ 89 پايىزى جىگىت نە قىزبەن كەزدەسۋگە ۇيالادى.
Forbes جۋرنالى ا ق ش- تا 1 مىڭنان استام وتباسىلى جانە بويداق ادامدار اراسىندا قارجىلىق جاعدايعا بايلانىستى ارنايى ساۋالناما جۇرگىزدى. ناتيجەسى مىناداي بولىپ شىققان. الدىمەن وتباسى قۇرماعاندارعا قاتىستىسىن ايتايىق. بويداقتاردىڭ 93 پايىزى جالعىز ءومىر ءسۇرۋدىڭ قالتاعا ۇلكەن سالماق سالاتىنىن مويىنداعان. ال 35 پايىزى قارجىلاي شىعىندى اتا-اناسى، باۋىرلارى نەمەسە ءبىر پاتەردە، بولمەدە بىرگە تۇراتىن اداممەن بولىسەتىنىن العا تارتادى. بويداقتاردىڭ 33 پايىزى باقاي ەسەپپەن ءومىر سۇرەدى ەكەن.
ەندى ۇيلەنگەندەرگە كەلەيىك. نەكەگە تۇرعانداردىڭ 76 پايىزى ءۇي بولعاننان كەيىن كىرىسىنىڭ كوبەيىپ، اقشاسىنىڭ قىزىعىن كورە باستاعانىن قۋانا حابارلاعان.
Forbes ساۋالناماسى: - بويداقتاردىڭ %93 جالعىزدىقتىڭ قارجىلاي اۋىرتپالىعىن مويىندايدى - بويداقتاردىڭ %35 شىعىندى اتا-اناسى، باۋىرلارى نەمەسە بىرگە تۇراتىن اداممەن بولىسەدى - بويداقتاردىڭ %33 «باقاي ەسەپ» قارىم- قاتىناستى ۇزاق ساقتاعىسى كەلەدى - ۇيلەنگەندەردىڭ %76 - وتباسى قۇرعالى بەرەكەسى كىرە باستاعان.
گەرمانيادا «بويداق سالىعى» بار
گەرمانيادا «بويداقتار سالىعى» بار دەپ ايتۋعا بولادى. ءبىراق ءدال ولاي اتالمايدى. بۇل ەلدە ۇستالاتىن سالىق 2 نارسەگە بايلانىستى. ءبىرىنشىسى - تابىس كولەمى، ەكىنشىسى - بالاڭىزدىڭ بولعانىنا نەمەسە بولماعانىنا بايلانىستى. گەرمانيادا سالىق جۇيەسىنىڭ 6 ساناتى بار. ءبىرىنشى ساناتقا بويداقتار، اجىراسقاندار، جالعىز قالعانىنا 2 جىل وتكەن جەسىرلەر جاتادى. ولار جىلدىق تابىسىنىڭ 28 پايىزىن سالىق رەتىندە تولەيدى. ءبىراق جىلدىق تابىس 9 مىڭ ەۋرودان اسۋعا ءتيىس.
ەگەر بالاڭىز بولىپ، ونى جالعىز تاربيەلەپ وتىرساڭىز، وندا اۆتوماتتى تۇردە بىردەن 2-ساناتقا ءوتىپ، كەرىسىنشە ۇكىمەتتەن جاردەماقى الاسىز. ال وتباسىڭىز، بالاڭىز بولماي، ءبىراق جىلدىق تابىسىڭىز 60 مىڭ ەۋرودان جوعارى بولسا، وندا كىرىسىڭىزدىڭ جارتىسىن سالىققا بەرەسىز.
امەريكالىقتاردىڭ %40- ى جالعىز تۇرادى
Pew Research Center زەرتتەۋ ورتالىعىنىڭ مالىمەتىنە سۇيەنسەك، ا ق ش- تاعى ەرەسەك تۇرعىنداردىڭ 40 پايىزى جالعىز تۇرادى ءارى ولاردىڭ مۇنى وزگەرتكىسى جوق. 1990-جىلى ەلدەگى بويداقتاردىڭ ۇلەسى 29 پايىز بولعان. ياعني كەيىنگى 34 جىلدىڭ ىشىندە جالعىزىلىكتى ۇلكەن ادامداردىڭ قاتارى 30 پايىزعا وسكەن.
جاپونيادا ماسىل بويداق كوپ
جاپونيادا ۇيلەنبەگەن ادامداردى «پاراسايتو سينگۋرۋ» دەپ اتايدى ەكەن. قازاقشا ماعىناسى - «قۋباس». «پاراسايتو سينگۋرۋ» تەرمينىن العاش 1999-جىلى توكيو ۋنيۆەرسيتەتىنىڭ الەۋمەتتانۋشى پروفەسسورى ماساحيرو يامادا ەنگىزگەن.
عالىمنىڭ زەرتتەۋىنشە، ۇيلەنبەگەن جاپون جىگىتتەرىنىڭ 60 پايىزى، ال تۇرمىسقا شىقپاعان كارى قىزداردىڭ 80 پايىزى اتا-اناسىمەن تۇرادى. 2002-جىلى جۇرگىزىلگەن ساۋالناماعا سايكەس، جاپونيادا اكە-شەشەسىنە ماسىل 10 ميلليون بويداق تىركەلگەن.
قىتايدا «بويداقتار كۇنى» تويلانادى
ەستىمەگەن ەلدە كوپ. وتباسى قۇرماعانداردى ەرەكشە ايالايتىن ەل قىتاي سەكىلدى. كورشى مەملەكەتتە «بويداقتار كۇنى» بار. ول ون ءبىرىنشى ايدىڭ ون بىرىندە تويلانادى. كۇن مەن ايدىڭ ءبىرىڭعاي «ءبىر» سانى بولىپ تاڭدالۋىندا دا سىر بار ەكەن. نۋمەرولوگياعا قاتتى سەنەتىن قىتايدا ءتورت «ءبىر» بويداق دەگەندى بىلدىرەدى جانە «ءبىر» ەشتەڭەسى جوق تاياقشاعا ۇقسايدى.
بۇل كۇندى بويداقتار كوبىنە جاقىن دوستارىمەن وتكىزەدى. ءىرى ساۋدا جەلىلەرى 11-قاراشادا جىل سايىن ۇلكەن جەڭىلدىكتەر جاسايدى.
ءبىراق بۇدان پايدا از سياقتى. امەريكالىق دەموگراف نيكولاس ەبەرشتادت «دەموگرافيانىڭ بولاشاعى» اتتى كىتابىندا 2030-جىلعا قاراي 30-40 جاستاعى قىتاي جىگىتتەرىنىڭ 30 پايىزعا جۋىعى بويداق بولاتىنىن ايتادى. عالىم «بۇل ۇلكەن داعدارىسقا» اكەلەدى دەپ بولجايدى. اتام قازاق «باس ەكەۋ بولماي، مال ەكەۋ بولمايدى» دەگەن ماقالدى تەگىننەن تەگىن ايتپاسا كەرەك. باسقانى بىلمەيمىن، ەڭ باستىسى، قازاق كوبەيسىن دەپ تىلەيمىز. قالاي دەگەنمەن دە، ءسۇربويداق بولعانشا، بالا-شاعاڭمەن كۇلىپ-ويناپ جۇرگەن جاقسى ەمەس پە؟!!
www.24.kz
