الەمدە 10 ەلدە بىلىكتى مامان جەتىسپەيدى: جاپونيا كوش باستاپ تۇر

استانا. قازاقپارات - ەلدە مامان تاپشىلىعى وسە بەرمەك. جالپى بۇل - ءبىزدىڭ ەلدە عانا ەمەس، الەمدە باستى ماسەلە. الەم بويىنشا بىلىكتى مامان تاپشىلىعى %77- كە جەتكەن.

10 جىل بۇرىن عانا بۇل كورسەتكىش %35 ەدى. ياعني، جۇمىس بار، ءبىراق ونى ىستەيتىن بىلىكتى كادر جوق. زەرتتەۋلەرگە سۇيەنسەك، 2030-جىلعا قاراي كادر جەتىسپەۋشىلىگى 85 ميلليوننان اسپاق. بۇل قازىرگى گەرمانيا حالقىنا تەڭ. مامان جەتىسپەگەندىكتەن، عالامدىق نارىقتا جىل سايىن 8,5 تريلليون دوللار يگەرىلمەي قالادى.

بىلىكتى مامان تاپشىلىعىنا نە سەبەپ؟

ساراپشىلار ءبىرىنشى كەزەكتە مامان جەتىسپەۋشىلىگىن زامانعا اكەپ تىرەيدى. ادامدار تۇرلەنگەن نەمەسە جاڭادان پايدا بولعان ماماندىقتاردى يگەرىپ ۇلگەرمەي جاتىر. باسقا دا سەبەپتەر بار.

بىلىكتى مامان ەڭ تاپشى ەلدەر

حالىقارالىق Insider Monkey زەرتتەۋ ورتالىعى الەمدەگى بىلىكتى مامان ەڭ كوپ جەتىسپەيتىن 10 ەلدى انىقتادى. تىزىمدە جاپونيا كوش باستاپ تۇر. كۇنشىعىس ەلىندەگى تاپشىلىق - %85. جاپونيادا تەحنولوگيا، ءبىلىم بەرۋ جانە مەديتسينا سالاسىندا قىزمەتكەر از. ودان كەيىنگى گرەكيا، گەرمانيا مەن يزرايلدەگى كورسەتكىش بىردەي. ەللادا ەلىنە اسىرەسە تۋريزم، قۇرىلىس جانە اۋىل شارۋاشىلىعى قىزمەتكەرلەرى قاجەت. رەسمي افينا بيىل 30 مىڭ زاڭسىز ميگرانتتىڭ قۇجاتىن تىركەپ، ءتۇرلى سالاعا جۇمىسقا الماقشى.

ەۋروپانىڭ ەڭ قۋاتتى ەكونوميكاسى - گەرمانياداعى كومپانيالاردىڭ جارتىسى بىلىكتى مامانعا مۇقتاج. نەمىس ەلىندە قازىر 1 ميلليون 800 مىڭ بىلىكتى ماماننىڭ ورنى بوس تۇر. پورتۋگالياعا 58 مىڭ قىزمەتكەر قاجەت. ساراپشىلار وسى 5 ەلدى زەرتتەگەندە بىلىكتى مامان تاپشىلىعىنىڭ ەڭ ءبىر ۇلكەن سەبەبى حالىقتىڭ قارتايۋىندا ەكەنىن انىقتادى.

جاپونيانىڭ %30، گرەكيا مەن پورتۋگاليانىڭ %23، گەرمانيانىڭ %22، ال يزرايلدىڭ %12 ءى -قاريا. بۇعان ەڭبەك ەتۋگە جاسى تولماعان جەتكىنشەكتەردى قوسىڭىز. جۇمىسقا جارامدى جاستاردىڭ كوبى جاڭا ماماندىقتى يگەرۋگە قۇلىقسىز.

زامانىنا قاراي مامانى

الەمدە الداعى 5 جىلدا ەڭ جوعارى سۇرانىسقا يە بولاتىن 10 كاسىپتىڭ ءبىرىنشىسى - جاساندى ينتەللەكت مامانى. 2025-جىلعا قاراي وسى ماماندىق يەسىن قاجەت ەتەتىن 12 ميلليون جۇمىس ورنى پايدا بولادى. تۇراقتى دامۋ ماماندىعى. بۇلار - كومپانيالاردى، بيزنەستى، نارىقتى دامىتاتىن ماماندار. ودان كەيىن بيزنەستى تالدايتىن جانە اقپاراتتىق قاۋىپسىزدىك جونىندەگى ساراپشىلار جوعارى سۇرانىسقا يە.

قارجى تەحنولوگياسىن يگەرگەن ينجەنەردىڭ ورنى التىننان باعالى بولماق. ۇزدىك وندىققا ەنگەن بۇل ماماندىقتاردىڭ جەتەۋى تىكەلەي سيفرلىق تەحنولوگيامەن بايلانىستى. ديدجيتال دەرەكتەرمەن جۇمىس ىستەي الاتىن ادامداردىڭ شوقتىعى بيىك، ارينە، سونىسىنا قاراي قالتاسى دا قالىڭ بولماق.

ا ق ش- قا جارتى ميلليون قۇرىلىسشى قاجەت

الپاۋىت ا ق ش-تا بيىلدىڭ وزىندە 500 مىڭ قۇرىلىسشى قاجەت. ال الداعى 5 جىلدا دەنساۋلىق ساقتاۋ سالاسىنا 3 ميلليون 200 مىڭ مامان تاپشى بولماق. 2030-جىلعا قاراي امەريكانىڭ وندىرىستىك قۋاتى باسەڭدەۋى مۇمكىن. ويتكەنى بۇل سالاعا 2 ميلليون 100 مىڭ بىلىكتى ادام جەتىسپەيدى. بىلتىر ا ق ش- تا 30 ميلليون تۇرعىن جۇمىسىنان كەتكەن.

4 كۇندىك جۇمىس كۇنىن سىنالىپ جاتىر

گەرمانيا 4 كۇندىك جۇمىس كۇنىن ەنگىزبەك. وسىلايشا، نەمىس ۇكىمەتىن مامان تاپشىلىعىن شەشۋدى كوزدەيدى. 1-اقپاننان باستاپ 4 كۇندىك جۇمىس كۇنىن 45 كومپانيا سىناقتان وتكىزىپ جاتىر. ساعاتى قىسقارعانىمەن، قىزمەتكەرلەردىڭ جالاقىسى بۇرىنعى قالپىندا تولىق ساقتالادى. كەيىنگى جىلدارى ەڭبەك كۇشى جەتىسپەگەندىكتەن، گەرمانيانىڭ وندىرىستىك قۋاتى تومەندەگەن. ءبىر جاعىنان، گەرمانيادا ادامدار ءجيى اۋىراتىن بولعان. بىلتىر قىزمەتكەرلەردىڭ ەڭبەككە جارامسىزدىق دەمالىسىن الۋىنا بايلانىستى نەمىس ەكونوميكاسىنداعى جالپى كىرىس 28 ميلليارد دوللارعا كەمىگەن.

www.24.kz