الماتىنى سەلدەن قورعايتىن بوگەت سالۋعا مىندەتتەلگەن كومپانيا باسشىسى كۇدىككە ءىلىندى
استانا. KAZINFORM - الماتىنى سەلدەن قورعاۋ ءۇشىن اقساي وزەنىنىڭ باسسەينىنە بوگەت سالۋعا مىندەتتەلگەن مەردىگەر كومپانيا مەملەكەتكە 775 ميلليون تەڭگە زالال كەلتىرگەن.
قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت ايتتى.
«قارجىلىق مونيتورينگ اگەنتتىگى ەلىمىزدىڭ ءۇش وبلىسىندا سۋ تاسقىنى كەزەڭىندە ازاماتتاردىڭ قاۋىپسىزدىگىن قامتاماسىز ەتۋگە ءتيىس بولاتىن سەلدەن قورعايتىن بوگەتتەر مەن سۋ قويمالارىن سالۋ جانە ءتيىستى جوندەۋ، وزەن ارنالارىن كەڭەيتۋ جۇمىستارىن جۇرگىزۋى ءتيىس مەردىگەرلەرگە قاتىستى سوتقا دەيىنگى تەرگەۋ امالدارىن جۇرگىزۋدە.
وسىلايشا، توتەنشە جاعدايلار مينيسترلىگى «قازسەلدەن قورعاۋ» مەملەكەتتىك مەكەمەسىمەن كەلىسىمشارتقا وتىرعان مەردىگەر ۇيىمنىڭ ديرەكتورى بيۋدجەت قاراجاتىن جىمقىرۋ دەرەگى بويىنشا كۇدىكتەنۋدە. ج ش س الماتى قالاسى «اقساي وزەنىنىڭ باسسەينىندە سەلدى ۇستايتىن بوگەت سالۋ» جوباسىن ىسكە اسىرعان»، - دەدى ول.
سەرىكتەستىكتىڭ جاۋاپتى ادامدارىنا الدىن الا ءسوز بايلاستى دەگەن ايىپ تاعىلۋى مۇمكىن.
«بۇل تۇلعالار اسا ءىرى كولەمدە، بيۋدجەت قاراجاتىن جىمقىردى دەگەن كۇدىككە ءىلىندى. زالال سوماسى الدىن-الا ەسەپ بويىنشا 775 ميلليون تەڭگەدەن اسادى»، - دەدى الىبەك ءابدىلوۆ.
اۆتور
ەسىمجان ناقتىباي
