الماتىنىڭ ديزاين-كودى بەكىتىلەدى

الماتى ءماسليحاتىنىڭ كەزەكتى سەسسياسى بارىسىندا دەپۋتاتتار قالانىڭ ديزاين-كودىن بەكىتتى، دەپ حابارلايدى Kazinform.

الماتى اكىمىنىڭ ورىنباسارى اسقار ءامريننىڭ ايتۋىنشا، شاھاردىڭ ديزاين-كودى - بۇل ءومىر سۇرۋگە قولايلى ۇيلەسىمدى مەگاپوليس قۇرۋ ءۇشىن قالالىق ورتانى قالىپتاستىرۋ جونىندەگى ەرەجەلەر مەن قاعيداتتاردىڭ جيىنتىعى.

«ءبىزدىڭ الدىمىزدا ەكى مىندەت تۇر - الماتىنىڭ تانىمال تاريحي كەلبەتىن ساقتاۋ جانە الەمدىك تەندەنسيالاردى ەسكەرە وتىرىپ، مەگاپوليستىڭ بولاشاق بەينەسىن دامىتۋ»، - دەدى الماتى اكىمىنىڭ ورىنباسارى اسقار ءامرين.

سونىمەن قاتار ول بۇل قۇجات وسى ماقساتتارعا قول جەتكىزۋگە ىقپال ەتۋگە ارنالعانىن اتاپ ءوتتى.

ديزاين- كود كەزەڭ-كەزەڭىمەن ەنگىزىلەتىن بولادى. جاڭا نىساندار ءۇشىن ۇسىنىستار مەن تالاپتاردىڭ تولىق كولەمى قولدانىلادى.

«ديزاين-كودتىڭ بولەك سەرۆيس- سايتى ازىرلەندى. بۇل اقپارات، رەسۋرستار جيناۋعا جانە ءبىلىم الماسۋعا ارنالعان ورتالىق الاڭ. سونىمەن قاتار، اتالعان سايت ديزاين-كودتى ەنگىزۋ بارىسىندا ديالوگ الاڭى رەتىندە قولدانىلاتىن بولادى. ديزاين-كودتى ازىرلەۋ كەزىندە بارلىق نورماتيۆتىك- قۇقىقتىق تالاپتار ورىندالدى»، - دەيدى ول.

وسىعان دەيىن الماتىنىڭ ديزاين-كود جوباسى ازىرلەنگەنىن جازعان بولاتىنبىز.

اۆتور

الما مۇقانوۆا