الماتىلىقتار تاۋەلسىزدىك مونۋمەنتىنە گۇل شوقتارىن قويدى
الماتى اكىمى ەربولات دوسايەۆ باستاعان قالا جۇرتشىلىعى تاۋەلسىزدىك مونۋمەنتىنە گۇل شوقتارىن قويدى، دەپ حابارلايدى Kazinform.
وندا الماتى قالاسى اكىمدىگى، قالالىق ارداگەرلەر كەڭەسى، ساياسي پارتيالار مەن قوعامدىق ۇيىمداردىڭ وكىلدەرى، 1986-جىلعى جەلتوقسان كوتەرىلىسىنە قاتىسۋشىلار، اۋعان سوعىسىنىڭ ارداگەرلەرى، جاستار ۇيىمدارىنىڭ وكىلدەرى گۇل شوقتارىن قويىپ، تاۋەلسىزدىك قۇرباندارىن ءبىر مينۋت ۇنسىزدىكپەن ەسكە الدى.
«قازاقستاندىقتاردى تاۋەلسىزدىك كۇنىمەن قۇتتىقتايمىن. ءبىز تاۋەلسىزدىككە قالاي قول جەتكىزگەندىگىمىز تۋرالى ءاردايىم ەستە ساقتاپ، كەلەر جاس ۇرپاققا جەتكىزۋىمىز كەرەك. بەيبىت زاماندا ءومىر ءسۇرىپ جاتقان جاستارعا ايتارىم: ءبىلىم الىڭىزدار، سپورتپەن شۇعىلدانىپ، ورتاق ءۇيىمىز - قازاقستاندى بىرگە كوركەيتەيىك»، - دەدى جەلتوقسان وقيعاسىنىڭ ارداگەرى، «ءورشىل رۋح» قوعامدىق بىرلەستىگىنىڭ باسشىسى سەرىك مۇحامەتالين.
قوعامدىق كەڭەستىڭ مۇشەسى، جازۋشى بەكنۇر كيسيكوۆ جينالعاندارعا بۇل كۇنىڭ قانشالىقتى ماڭىزدى ەكەنىن ايتتى.
«جىل سايىن وسىندا كەلۋ مەن ءۇشىن ۇلكەن مارتەبە. ويتكەنى مەن 1986-جىلى وسىندا بولدىم. مۇنىڭ ءبارى مەنىڭ كوز الدىمدا ءوتتى. مەن ءۇشىن بۇل قاسيەتتى مەرەكە، قاسيەتتى كۇن. بۇل - ەسكە الۋ كۇنى. تاۋەلسىزدىكتىڭ 32 جىلىندا ءبىز بارلىق سالادا كوپ نارسەگە قول جەتكىزدىك. الەمدىك ارەنادا تانىلۋ، ديپلوماتيالىق جانە ەكونوميكالىق دەڭگەيدە تانىلۋ. ءبىز ورتالىق ازياداعى ورتالىق ەكونوميكالىق درايۆەرمىز. بۇل كۇن 1986-جىلى العاش رەت تاۋەلسىزدىك تۋرالى ويلاعانىمىزبەن قۇندى»، - دەيدى بەكنۇر كيسيكوۆ.
ەستەرىڭىزگە سالا كەتەيىك، قازىرگى ۋاقىتتا الماتىدا 1986-جىلى جەلتوقسان وقيعاسىنا قاتىسقان 670 ادام تۇرادى. بيىل ولارعا بەرىلەتىن ءبىرجولعى تولەم 150 مىڭ تەڭگەدەن 250 مىڭ تەڭگەگە دەيىن ۇلعايتىلدى.
اۆتور
الما مۇقانوۆا
