الماتىلىق زووبەلسەندىلەر حايۋاناتتار باعىنداعى اق ايۋدىڭ جاعدايىنا الاڭداۋشىلىق ءبىلدىردى

الماتى. KAZINFORM - «الماتى جانۋارلارىنا كومەك» قوعامداستىعى الماتى حايۋاناتتار باعىنداعى اق ايۋدىڭ جاعدايىنا قاتىستى جازبا جاريالادى.

زووبەلسەندىلەردىڭ پىكىرىنشە، الماتى حايۋاناتتار باعىنداعى پۋرگا ەسىمدى اق ايۋ قاتتى جۇدەپ كەتكەن. ولار جەلىدەگى پاراقشالارىنا اق ايۋلاردىڭ شىن مانىندە قانداي بولۋ كەرەك ەكەنىن كورسەتەتىن سۋرەتتەردى سالدى.

«اق ايۋلاردىڭ قانداي بولۋ كەرەك ەكەنىن سالىستىرىپ كورىڭىز. وسىدان ءبىر جىل بۇرىن پۋرگا اق ايۋىنىڭ ءتۇرى باسقاشا ەدى. الماتى زووباعىندا ول وسىنداي كۇيگە ءتۇستى. سونداي-اق ودان ۇرپاق الۋ ءۇشىن زووباق مۇشەلەرى وعان اتالىق ىزدەپ جاتقانىن حابارلادى. بولاشاق انانىڭ مىناداي كۇيدە جۇرە بەرۋىنە جول بەرمەۋ كەرەك» ، - دەپ مالىمدەدى زووبەلسەندىلەر.

ولار سونداي-اق زووباقتان جانۋارلاردى قورەكتەندىرۋگە مۇمكىن قاراجات قاجەت ەكەنىن سۇرادى.

«بالكىم سىزدەرگە قارجى جيناۋعا كومەك كەرەك شىعار؟ .. ول جاعىنان تۇرعىندار كومەكتەسەدى. ءبىز ءوز كۇشىمىزبەن تەك اۋلانعان جانە قاڭعىباس جانۋارلاردى عانا ەمەس، مەملەكەتتىڭ زووكوللەكسياسىن دا قورەكتەندىرەتىن بولامىز»، - دەپ جازدى زووبەلسەندىلەر.

زووبەلسەندىلەردىڭ كوتەرگەن ماسەلەلەرى شىندىققا جاناسپايدى. بۇل تۋرالى الماتى حايۋاناتتار باعى رەسمي تۇردە مالىمدەدى.

حاياۋاناتتار باعىنىڭ مالىمەتىنشە، پۋرگا اق ايۋى الماتى حايۋاناتتار باعىنا 2023 -جىلى «ەۋروپالىق حايۋاناتتار باعى جانە اكۆاريۋمدار قاۋىمداستىعى» باعدارلاماسى بويىنشا ماسكەۋ حايۋاناتتار باعىنان اكەلىنگەن.

«الماتى زووباعى بۇل باعدارلامانىڭ قاتىسۋشىسى بولىپ تابىلادى. سەبەبى، ءبىزدىڭ زووباقتىڭ اق ايۋلاردى كۇتىپ ۇستاۋدا ۇلكەن تاجىريبەسى بار. ءالى كۇنگە دەيىن الكور اق ايۋى كوپ ادامنىڭ ەسىندە بولار، ول ءبىزدىڭ زووباقتا 32 -جىل ءومىر ءسۇردى، بۇل ءوز كەزەگىندە ەركىندىكتە ءومىر سۇرەتىن اق ايۋلاردان الدەقايدا ۇزاق ءومىر سۇرگەنىن كورسەتەدى. الماتى حايۋاناتتار باعىندا اق ايۋدى كۇتىپ ۇستاۋ جاعدايلارى مەن تاماقتانۋى ەحبجاق جانە ماسكەۋ حايۋاناتتار باعىنىڭ (اي سايىن پۋرگانىڭ جاعدايىن تەكسەرىپ وتىرادى) تالاپتارىنا سايكەس كەلەدى» ، - دەپ جازدى زووباق ۇجىمى.

سونداي- اق زووباقتىڭ مالىمەتىنشە، بيىل اقپان ايىندا ە ح ب ج ا ق كۋراتورلارى Douglas Richardson مەن Mats Hِggren جانە ماسكەۋ حايۋاناتتار باعىنان مارينا گالەشۋك كەلىپ، پۋرگانىڭ ۇستاۋ جاعدايى مەن جەيتىن تاماعىن تەكسەرىپ كەتكەن. ايۋدىڭ ەكى باسسەينىمەن جالپى اۋدانى 750 м² بولاتىن ۆولەرى بار. وندا ونەركاسىپتىك كونديتسيونەر مەن «سۋىق» ەدەن بار. پۋرگانىڭ كۇندەلىكتى راتسيونى: سيىر ەتى - 4,5 كەلى، تاۋىق ەتى - 2,5 كەلى، مايشاباق - 2 كەلى، قىزعىلت لوسوس - 1 كەلى، مينتاي - 1 كەلى، ءسابىز - 1 كەلى، سالات - 0,5 كەلى، الما - 1 كەلى، المۇرت - 0,5 كەلى.

ال ايۋدىڭ ۇسقىنسىز فوتوسۋرەتىنە كەلەر بولساق، ونىڭ كۇيى مەن سىرتقى تۇرىنە اسەر ەتەتىن كليماتتىق جاعدايدى ەسكەرۋ قاجەت. ونىڭ ۇستىنە كوكتەمدە بارلىق جانۋارلار، ونىڭ ىشىندە اق ايۋلار دا تۇلەيدى. ناتيجەسىندە كەلبەتى ۇسقىنسىز كورىنگەن.

«الماتى جانۋارلارىنا كومەك» قوعامداستىعىنىڭ پۋرگا جايلى كوتەرگەن ماسەلەلەرى شىندىققا جاناسپايدى جانە الماتى حايۋاناتتار باعىنىڭ ىسكەرلىك بەدەلىنە نۇقسان كەلتىرەدى. بۇل ماتەريالدىق جانە يميدجدىك زيان كەلتىرۋى مۇمكىن. شىندىققا جاناسپايتىن مالىمەتتى (جالعان اقپاراتتى) تاراتۋ ق ر زاڭناماسىنا سايكەس اكىمشىلىك جانە قىلمىستىق جاۋاپكەرشىلىككە اكەلەدى. ال جانۋارلاردى كۇتىپ ۇستاۋ ءۇشىن زووباق ەشقانداي قارجىلاي كومەككە مۇقتاج ەمەس. ءار ادام زووباققا كەلىپ، اق ايۋلاردىڭ لايىقتى دەڭگەيدە ءومىر ءسۇرىپ جاتقانىن كورۋىنە بولادى»، - دەپ جاۋاپ بەردى الماتى زووباعى جەلىدە.

اۆتور

دۋمان ارعىنگەلدى