الماتىلىق دارىگەرلەر جۇرەككە كۇردەلى وپەراتسيا جاسادى
استانا. قازاقپارات - الماتىداعى كارديولوگيالىق ورتالىق دارىگەرلەرى العاش رەت جۇرەككە جاساندى سول جاق قارىنشانى يمپلانتاتسيالاۋ وپەراتسياسىن جاسادى.
مەديتسينادا مۇنى- LVAD قۇرىلعىسىن يمپلانتاتسيالاۋ دەپ اتايدى. LVAD - سوزىلمالى جۇرەك جەتكىلىكسىزدىگى بار ناۋقاستارعا كومەكتەسەتىن يننوۆاتسيالىق مەديتسينالىق قۇرىلعى. وسىنداي كۇردەلى وپەراتسيانىڭ جاسالۋى قالالىق دەنساۋلىق ساقتاۋ جۇيەسى ءۇشىن ايتۋلى وقيعا.
LVAD - جۇرەكتىڭ سول جاق قارىنشاسىنىڭ جۇمىسىن قامتاماسىز ەتەتىن مەحانيكالىق كومەكشى قۇرال. ول قان اينالىمىن جاقسارتىپ، اۋرۋدىڭ اسقىنۋ قاۋپىن ازايتادى. 45 جاستاعى مارات مۇستافين ءۇش بالانىڭ اكەسى. ءۇش جىل بۇرىن جۇرەگى اۋىرىپ، اۋرۋحاناعا تۇسكەن. دياگنوز قويىلعان ساتتەن باستاپ جاعدايى كۇرت ناشارلاعان. ستاتسيونارلىق ەمدەۋدەن وتكەنىمەن دەنساۋلىعى تۇزەلمەدى. دارىگەرلەردىڭ كەڭەسىنەن كەيىن LVAD قۇرىلعىسىن ورناتتى. قازىر جاعدايى جاقسى. جۇرەگىنىڭ سوعىسى قالىپتى.
مارات مۇستافين، الماتى قالاسىنىڭ تۇرعىنى:
- جىل سايىن دارىگەرلىك تەكسەرىستەن ءوتىپ تۇردىم. ال ەكى اي بۇرىن جانساقتاۋ بولىمىندە جاتتىم. سودان كوپ ويلانباستان وپەراتسيا جاساتقىم كەلدى. ەكى جەتى بۇرىن وپەراتسيا جاسادى. ءتاۋىرمىن. دارىگەرلەرگە شەكسىز العىس ايتامىن. كارديولوگيالىق ورتالىقتا جۇرەككە وپەراتسيا جاساۋدىڭ زاماناۋي ادىستەرى قولدانىلادى. ەندى ناۋقاستار باسقا قالالارعا بارماي- اق قاجەتتى كومەكتى الا الادى.
نۇرجان مۇسىرەپوۆ، كارديوحيرۋرگيا ءبولىمىنىڭ مەڭگەرۋشىسى:
- ءبىرىنشى رەت LVAD دەگەن اپپارات ورناتتىق. ول يسكۋسستۆەننىي ليەۆىي جەلۋدوچوك دەيدى عوي. وسى وپەراتسياعا ءبىرازدان بەرى دايىندىق ءجۇردى. استاناعا بارىپ بىرنەشە رەت وقىپ قايتتىق. LVAD قۇرىلعىسى ناۋقاستىڭ عۇمىرىن ايتارلىقتاي ۇزارتادى. جالپى كەلەسى جىلى ورتالىق دارىگەرلەرى وسىنداي ونشاقتى وپەراتسيا جاساۋدى جوسپارلاپ وتىر.
24.kz
