الماتىلىق عالىمدار نانوپلاستىر جاساپ شىعاردى

استانا. KAZINFORM - مەديتسينا ماماندارىنىڭ ايتۋىنشا، پلاستىر جارانىڭ تەز جازىلۋىنا سەپتىگىن تيگىزەدى. وعان قوسا، باكتەريامەن كۇرەسەدى. ەڭ باستىسى وتاندىق شيكىزاتتان جاسالعاندىقتان، ەكولوگيالىق تازا ءونىم سانالادى.

عالىمدار يننوۆاتسيالىق باستامانى Satbayev University- ءدىڭ زەرتحاناسىندا جۇزەگە اسىرعان. مىنا ىدىستارداعى جۇقا قابىق تابيعي پوليمەردىڭ ەڭ تازاسى. بۇل بيوماتەريالدار بەنتونيت سازىنان، سەلليۋلوزادان، كراحمالدان جانە جەلاتيننەن الىنعان. ونىڭ بارلىعى ءوز ەلىمىزدە وندىرىلەدى جانە وڭاي سينتەزدەلەدى. حيميا ماماندارى وسىلاي دەيدى. نانوپلاستىر يننوۆاتسيالىق تاسىلمەن جاسالعان. سوندىقتان قاۋىپسىز. دەنەدەگى كەسىپ العان جەرگە، قاجالعان تەرىگە جاپسىرساڭىز ناتيجەسى كوپ كۇتتىرمەيدى. جىلدام جازادى. باعاسى دا قولجەتىمدى.

اناستاسيا كۋحاريەۆا، ۋنيۆەرسيتەتتىڭ كىشى عىلىمي قىزمەتكەرى - مۇنى كادىمگى پلاستىر سياقتى جاپسىراسىز. ءبىراق اسەرى ودان مۇلدەم بولەك. زاقىم كەلگەن تەرىگە جابىسقاندا پايدالى زاتتار تەز سىڭەدى. ءسويتىپ، ونىڭ جازىلۋىن جىلدامداتادى. جارا جازىلىپ كەتكەنشە الماۋ كەرەك.

جەلىم رەتىندە كادىمگى جابىسقاق تاسپا قولدانىلادى. ال بەلسەندى انتيسەپتيكالىق زاتى زەرتحانادا وسىمدىك سىعىندىسىنان الىنعان كۇمىس نانوبولشەكتەر. بۇل دەزينفەكسيا جاسايدى. قابىنۋدى باسادى. زاقىمدالعان تەرىنىڭ بەتكى قاباتىن پاتوگەندىك ميكروورگانيزمدەردەن قورعايدى. تاجىريبە كۇمىس نانوبولشەكتەرىنىڭ اسەرى انتيبيوتيكتەردىڭ اسەرىمەن بىردەي ەكەنىن كورسەتتى. ءۇندىستاندىق عالىم فەيسال ۋسمان بحاي حوليا بۇل تەحنولوگيانى بولاشاقتا قاتەرلى ىسىككە قارسى كۇرەستە قولدانۋعا بولادى، - دەپ ەسەپتەيدى.

فايسال ۋسمان بحاي حوليا، ۋنيۆەرسيتەتتىڭ پوستدوكتورانتى /ءۇندىستان/:

- ءبىز باكتەريانى پەتري تاباقشاسىنىڭ تۇبىنە وسىردىك. ەكىنشى شىنىاياققا كۇمىس نانوبولشەكتەرىن قوستىق. وسى نانوبولشەكتەر باكتەريانىڭ كوبەيۋىنە جول بەرمەيدى. ياعني، ونىڭ جايىلۋىنا قارسى ارەكەت ەتەدى. سوندىقتان، ەڭ جوعارعى جاعىندا بوس ايماق پايدا بولدى.

ساتبايەۆ ۋنيۆەرسيتەتىنىڭ ينجەنەرلىك باعىتتاعى زەرتحاناسىندا 20-دان استام عالىم ايەل جۇمىس ىستەيدى. ولاردىڭ ەڭبەكتەرى اۋىل شارۋاشىلىعى، مەديتسينا جانە حيميا ونەركاسىبىندەگى ماسەلەلەردى شەشۋگە باعىتتالعان. قازىر عىلىم جانە جوعارى ءبىلىم مينيسترلىگىنىڭ تاپسىرىسىمەن جاسالىپ جاتقان جارانى ەمدەۋگە ارنالعان نانوپلاستىر جوباسى اياقتالۋعا جاقىن. زەرتتەۋدەن كەيىن عالىمدار تەحنولوگيانى وندىرىسكە ەنگىزىپ، ونى كوممەرتسيالىق ماقساتتا قولدانۋدى جوسپارلاپ وتىر.