الماتىداعى مەترو قۇرىلىسىنان 5 ميلليارد قارجى جىمقىرعان 10 ادامعا قاتىستى ۇكىم شىقتى

الماتى. KAZINFORM - الماتى قالاسىنىڭ المالى اۋداندىق سوتىمەن وڭتۇستىك استاناداعى مەترو قۇرىلىسى كەزىندە 5 ميلليارد تەڭگەدەن استام بيۋدجەت قاراجاتىن جىمقىردى دەپ ايىپتالعان 10 ادامعا قاتىستى ۇكىم شىقتى.

قىلمىسقا قاتىستى سوتقا دەيىنگى تەرگەپ-تەكسەرۋدى كولىك پروكۋراتۋراسى جۇرگىزدى. بۇل تۋرالى باس كولىك پروكۋراتۋراسى مالىمدەدى.

ءمالىم بولعانداي، سوتتالۋشىلار «مەتروپوليتەن» ك م ك، «الماتى مەترو قۇرىلىس» ا ق، «اۆتوماتتاندىرۋ جانە تەحنولوگيالار قىزمەتى» ج ش س-دا باسشىلىق لاۋازىمدا وتىرىپ، سىبايلاس توپپەن بىرگە 2018 -جىلدىڭ ماۋسىمىنان 2020 -جىلدىڭ تامىزىنا دەيىنگى كەزەڭدە «سارى ارقا» جانە «دوستىق» ستانسيالارىن سالۋ بارىسىندا قارجى جىمقىرعان. ايلاسىن اسىرعاندار قۇجاتتا جابدىقتىڭ قۇنىن ارتىق كورسەتىپ (ءىس جۇزىندە 10 ەسە)، تۇراقتى تۇردە ءىرى كولەمدەگى اقشالاردى جالعان فيرمالار ارقىلى شىعارعانىنى دالەلدەندى.

سوت شەشىمىمەن الماتى مەتروسىنىڭ بۇرىنعى باسشىسى ەربول ءابىلدينوۆقا 8 جىل باس بوستاندىعىنان ايىرۋ جازاسى تاعايىندالدى. سونداي- اق ە. ابجاپپار مەن ە. قاپايەۆ 8 جىلعا، ج. اريسوۆا مەن ن. اريسوۆ 7 جىل 6 ايعا، ۆ. حەن 7 جىلعا سوتتالدى. ج. اريسوۆانىڭ 2023 -جىلى تۋىلعان ءسابيىنىڭ بولۋىنا بايلانىستى وعان جازانى وتەۋ مەرزىمى 5 جىلعا كەيىنگە قالدىرىلدى. قالعان ايىپتالۋشىلار - ق. بەكمۇحامبەت پەن ا. راحىمجانوۆ 2 جىل 9 ايعا، ال ا. حەگاي مەن ن. اكيشيەۆكە 1 جىلعا باس بوستاندىعىنان ايىرۋ جازاسى تاعايىندالدى.

سونىمەن قاتار ەربول ءابىلدينوۆ ءومىر بويىنا، ال قالعان ايىپتالۋشىلار بەلگىلى ءبىر مەرزىمگە قارجى سالاسىنداعى جاۋاپتى لاۋازىمداردى جانە باسشىلىق لاۋازىمداردى اتقارۋ قۇقىعىنان ايىرىلدى.

سوت ە. ءابىلدينوۆ، ە. ابجاپپار، ە. قاپايەۆ، ج. اريسوۆا، ن. اريسوۆ جانە ۆ. حەننىڭ ءارقايسىسىن 50 ميلليون 893 مىڭ تەڭگە شىعىندى وتەۋگە مىندەتتەدى.

سونىمەن قاتار، سوت 1 ميلليارد تەڭگەدەن استام سوماعا تىيىم سالىنعان مۇلىكتى تاركىلەۋدى قولدانىپ، مەملەكەتكە كەلتىرىلگەن شىعىندى ءوندىردى.

سوت ۇكىمى زاڭدى كۇشىنە ەنگەن جوق.

ايتا كەتەيىك، بۇعان دەيىن «مەتروپوليتەن» ك م ك- دا 5 ميلليارد تەڭگە جىمقىرۋ دەرەگى بويىنشا تەرگەۋ 2023 -جىلى 28-تامىزدا اياقتالعانىن جازعان ەدىك.

سونداي- اق «سارى ارقا» جانە «باۋىرجان مومىش ۇلى» جاڭا مەترو ستانسالارىنىڭ قۇرىلىسى كەزىندەگى 5 ميلليارد تەڭگەنىڭ ۇرلانۋىنا قاتىستى سوت پروتسەسىنىڭ بارىسى تۋرالى جازعانبىز.

اۆتور

دوسبول اتاجان