الماتىداعى جەر سىلكىنىسى باستان-اياق ۆيدەوعا ءتۇسىپ قالدى

الماتى. KAZINFORM - بۇگىن الەۋمەتتىك جەلىدە الماتىداعى جەر سىلكىنىسى ءتۇسىپ قالعان ۆيدەو تارادى.

ەكى مينۋتقا سوزىلاتىن ۆيدەودا 23-قاڭتار تۇنگى 00:09 كەزىندە باستالعان ءزىلزالانىڭ جەردى قالاي قيمىلداتىپ، تەربەپ جاتقانى ءتۇسىپ قالعان. بۇل جاعداي 00:11-گە دەيىن جالعاسادى.

عيمارات سىرتىنا نەمەسە كوشەگە ورناتىلعان ۆيدەوكامەرا الماتىنىڭ تاۋلى اۋداندارىندا تۇرعانى كورىنىپ تۇر.

ەسكە سالايىق، بۇگىن، قاڭتاردىڭ 22-سىنەن 23-ىنە قاراعان ءتۇنى الماتىدا بىرنەشە تولقىنمەن جەر سىلكىندى.

رەسمي مالىمەت بويىنشا العاشقى ءدۇمپۋدىڭ امپليتۋداسى 5 بالعا دەيىن جەتكەن. سالدارىنان ۇرەي بوي الدىرعان تۇرعىنداردىڭ ءبىر بولىگى قالانى تاستاپ شىعۋعا بەكىنگەن.

مۇنىڭ ارتى كولىك كەپتەلىسىنە ۇلاسىپ، جانارماي بەكەتتەرىندە كەزەك پايدا بولعان.

حالىق اراسىنداعى بايبالامدى پايدالانىپ تاكسي باعاسىن بىرنەشە ەسە كوتەرىپ جىبەرۋ فاكتىلەرى دە تىركەلدى.

ەپيتسەنترى الماتىدان وڭتۇستىك- شىعىسقا قاراي 264 شاقىرىم جەردە، قىرعىزستان مەن قىتاي شەكاراسىندا ورنالاسقان تۇنگى جەر سىلكىنىسى الماتى مەن شىمكەنتتەن بولەك، استانادا جانە قازاقستاننىڭ بەس وبلىسىندا سەزىلگەن.

جەر سىلكىنىسى كەزىندە الماتى قالاسىندا 8 ادام زارداپ شەكتى، ءبىر تۇرعىننىڭ جاعدايى اۋىر.

جاراقات العان ءۇش ادام تۇرعىن ءۇيدىڭ 2 جانە 3-قاباتىنان سەكىرگەن.

24-25-قاڭتار كۇندەرى پرەزيدەنت قاسىم- جومارت توقايەۆ الماتىعا بارادى.

ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنبايەۆ الماتىدا جاقىن ۋاقىتتا جويقىن جەر سىلكىنىسى بولمايتىنىن ايتتى.

اۆتور

جانات قاپالبايەۆا