الماتىداعى بوتانيكالىق باقتا ءبىرقاتار اۋرۋدىڭ الدىن الۋعا كومەكتەسەتىن جەمىس وسەدى
الماتى. KAZINFORM - الماتىنىڭ بوتانيكالىق باعىندا «التىن الما» اتانعان جەمىس وسەدى. كۋمكۆاتتىڭ ەمدىك قاسيەتتەرى تۋرالى ەجەلگى قىتاي شەجىرەلەرىندە جازىلعان.

بوتانيكالىق باقتىڭ مالىمەتىنشە، بۇل ەرەكشە جەمىستىڭ بىرنەشە اتاۋى بار: كۋمكۆات، كينكان، فورتۋنەللا، التىن اپەلسين، التىن الما.
دارىلىك كۋمكۆات - ديامەترى 2-2,5 س م. مينياتيۋرالىق سوپاق اپەلسيندەرگە ۇقسايدى. ءدامى ماندارينگە كەلەدى. ونى قابىعىمەن جەۋگە بولادى.
- جاپونيادا وسىمدىكتى «كينكان» دەپ اتايدى. اۋدارمادا «التىن اپەلسين» دەگەن ماعىنانى بىلدىرەدى. قىتايلار ونى «كۋمكۆات» دەپ اتايدى. اۋدارمادا «التىن الما» دەپ اتالادى، - دەلىنگەن حابارلامادا.
كۋمكۆاتتىڭ وتانى - قىتايدىڭ وڭتۇستىك-شىعىس بولىگى. ول تۋرالى العاشقى اقپارات 12-عاسىردا ەجەلگى قىتاي شەجىرەلەرىندە جازىلعان. كۋمكۆات شيكى دە، وڭدەلگەن تۇرىندە دە قولدانىلادى (كامپيتتەر، دجەم، مارمەلاد، ليكەرلەر) .
- قىتايدىڭ ءداستۇرلى ەمشىلەرى كۋمكۆاتتى دانالىق جەمىسى دەپ اتاعان. ويتكەنى وسىمدىكتىڭ جەمىستەرى ميدىڭ بەلسەندىلىگىن ارتتىرىپ، ويلاۋ پروتسەسىن دامىتادى. كۋمكۆاتتىن پايدالى قاسيەتتەرى مۇنىمەن اياقتالمايدى. ازيا ەلدەرىنىڭ تۇرعىندارى وتتىڭ قاسىنا كۋمكۆاتتىڭ قابىعىن قويىپ، ءتۇتىنىن دەممەن جۇتادى. بۇل جوتەل مەن سۋىق تيۋدى ەمدەيدى. بۇدان بولەك، اسقازان-ىشەك جولدارىنىڭ جۇمىسىن جاقسارتىپ، قانداعى حولەستەريندى تومەندەتەدى جانە كۇيزەلىستى جەڭۋگە كومەكتەسەدى، - دەپ اتاپ ءوتتى بوتانيكالىق باق ماماندارى.
وسىعان دەيىن الماتىنىڭ بوتانيكالىق باعىندا ميدى تىنىشتاندىرۋعا كومەكتەسەتىن شۇيگىنشوپ گۇلى تۋرالى جازعان ەدىك.
اۆتور
الما مۇقانوۆا